ខេត្តព្រះវិហារ ÷នៅរសៀលថ្ងៃទី១៧ ខែមិថុនា ឆ្នាំ២០២៣ លោកឧត្តមសេនីយ៍ត្រី កង សៅគុណ បានដាក់កំលាំងត្រួត ពិនិត្យតាមគោលដៅព្រំប្រទល់ ឃាត់បានរថយន្ដដឹកសិប្បកម្មកែច្នៃអត់ច្បាប់បានចំនួន ២គ្រឿងនៅស្នាក់ការសន្តិសុខអាវុធហត្ថព្រំប្រទល់ព្រះវិហារ-កំពង់ធំ ប្រគល់ជូនមន្ត្រីបរិស្ថាន ដែនជំរកសត្វព្រៃបឹងពែរចាត់ការតាមនិតិវិធីច្បាប់។
ប្រតិបត្តិការនេះ បានធ្វើឡើងក្រោយពីទទួលបាននៅបទបញ្ជារបស់ប្រមុខរាជរដ្ឋាភិបាល សេចក្ដីសម្រេចស្ដីអំពីការបង្កើតអនុគណៈកម្មការខេត្តដើម្បីទប់ស្កាត់ និងបង្ក្រាបបទល្មើសធនធានធម្មជាតិក្នុងភូមិសាស្ត្រខេត្តព្រះវិហារ ដែលមានលោកគីម រិទ្ធី អភិបាលខេត្តព្រះវិហារ ជាប្រធាន បានដាក់បទបញ្ជាយ៉ាងតឹងរឹងក្នុងការទប់ស្កាត់ និងបង្ក្រាបបទល្មើសធនធានធម្មជាតិនានាដែលកំពុងកើតមានក្នុងខេត្តព្រះវិហារ ។
សមត្ថកិច្ចចម្រុះបានបង្ក្រាបរួមមាន៖ ១.រថយន្ដToyota tundra ពណ៌ស ពាក់ស្លាកលេខ ភ្នំពេញ 2AV-1271 ដឹកក្ដារចាស់ទុំអត់ច្បាប់។ ២.រថយន្ដ Toyota tundra ពណ៌មាស ពាក់ស្លាកលេខ ភ្នំពេញ 2BL-5981ដឹកសិប្បកម្មកែច្នៃអត់ច្បាប់។
ឧត្តមសេនីយ៍ត្រី កង សៅគុណ បានបញ្ជាក់ថា គ្រប់សិប្បកម្មអត់ច្បាប់ មិនថានៅកន្លែង ធ្វើសិប្បកម្ម ឬដឹកចេញតាមរថយន្ដនោះទេ គឺខុសច្បាប់ទាំងស្រុង ហើយបាត់ថវិការចំណូលចូលរដ្ឋថែមទៀត ហេតុដូចនេះហើយគ្រប់សិប្បកម្ម និងដេប៉ូលក់គ្រឿងសង្ហារឹមសិប្បកម្មឈើកែច្នៃត្រូវរត់ច្បាប់បង់ពន្ធចូលរដ្ឋឲបានត្រឹមត្រូវតាមច្បាប់អនុញាតិ។
ចំពោះបងប្អូន ឬអ្នកស៊ីឈ្នួលដឹកគ្រឿងសង្ហារឹមសិប្បកម្មឈើកែច្នៃ ត្រូវសួររកច្បាប់ទំលាប់ពីម្ចាស់អ្នកលក់ឲ្យបានត្រឹមត្រូវ ចៀសវាងនូវរបស់ខុសច្បាប់ ដូចនៅថ្ងៃនេះត្រូវបានឃាត់រថយន្ដ២គ្រឿងខាងលើដឹកគ្រឿងសង្ហារឹមឈើកែច្នៃអត់ច្បាប់។ បើបងប្អូននៅតែបន្តដឹកដោយគ្មានលិខិតអនុញាតិ គឺបង្ក្រាប មិនថាយប់ឬថ្ងៃ។
ឧត្តមសេនីយ៍ត្រីមេបញ្ជាការបាន ផ្ញើសារទៅកាន់ក្រុមឱកាសនិយម ដើរបំផុសបំផុលឲ្យប្រជាពលរដ្ឋចូលទៅកាប់ដីព្រៃខុសច្បាប់ដោយយកលេសថា ជិតបោះឆ្នោតសមត្ថកិច្ចមិនហ៊ានចាប់បង្ក្រាបនោះទេខ្លាចបាត់សន្លឹកឆ្នោត តែខុសហើយឱ្យតែធ្វើខុសត្រូវតែបង្ក្រាប ។ ហើយសារមួយទៀតសូមឱ្យបងប្អូនដែលមានត្រាក់ទ័រ ឬ គ្រឿងចក្រ មុននឹងភ្ជួរ រុញ គាស់កាយ ត្រូវសួររកប័ណ្ណកម្មសិទ្ធិ ។
សូមបញ្ជាក់ផងដែរថា បច្ចុប្បន្នក្រុមដឹកបទល្មើសផលអនុផលព្រៃឈើនៅតែកើតមាន តាមគោយន្តកន្ត្រៃ រថយន្ថសាំយ៉ុង តាមដែលពួកគេអាចធ្វើបានដើម្បីបំភ័ណ្ឌភ្នែកសមត្ថកិច្ច មួយចំណែកធំ គឺរថយន្ដធន់ត្រា នេះឯងដឹកសិប្បកម្មកែច្នៃឃើញគួរខ្លាច និងតាមរថយន្ដសាំយ៉ុងដឹកឈើដល់ដំបូលក៏មានរាល់ថ្ងៃដែរ៕