ភ្នំពេញ៖ ក្រោយពីមានការភ្ញាក់ផ្អើលទាក់ទងនឹងរឿងមន្ត្រីនគរបាលខណ្ឌកំបូលម្នាក់បានប្រើប្រាស់ហិង្សា ពេលនេះអាជ្ញាធរបានទទួលពាក្យបណ្ដឹងហើយ និងធ្វើការកោះហៅជនបង្កឱ្យចូលបំភ្លឺ និងបន្តនិតិវិធីពាក់ព័ន្ធនឹងការប្រើប្រាស់ហិង្សានេះ។
នេះបើយោងតាមការបញ្ជាក់ពី លោកឧត្តមសេនីយ៍ត្រី សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១៤ ខែកក្កដា ឆ្នាំ២០២៣ បានបញ្ជាក់ថា៖
« រហូតមកដល់ពេលនេះអាជ្ញាធរមូលដ្ឋានខណ្ឌកំបូល បានទទួលពាក្យបណ្តឹងពីនារីរងគ្រោះរួចរាល់ហេីយ។ ទន្ទឹមនេះអាជ្ញាធរក៏បានធ្វើការកោះហៅជនបង្កហឹង្សាចូលបំភ្លឺ ហើយសមត្ថកិច្ចកំពុងបន្តនីតិវិធីពាក់ព័ន្ធនឹងការប្រើប្រាស់អំពើហិង្សានេះ។»
សូមជម្រាបជូនថា ករណីប្រើអំពើហិង្សាដែលដែលមានការភ្ញាក់ផ្អើលនេះបង្កឡើងដោយបុរសម្នាក់ ឈ្មោះ ប៉ែន នុត ជានាយផ្នែកនៃអធិការដ្ឋាននគរបាលខណ្ឌកំបូល ទៅលើនារីម្នាក់ដោយ ក្នុងហេតុការណ៍នោះ ស្ត្រីរងគ្រោះបានស្រែកដង្ហើយរកយុត្តិធម៌ ខណៈដែលបុរសប្រើប្រាស់អំពើហិង្សាជាមន្ត្រីអនុវត្តច្បាប់ បែរជាល្មើសច្បាប់បង្កជាហិង្សាទៅលើស្ត្រីរងគ្រោះ។
ទោះជាយ៉ាងណារហូតមកដល់ពេលនេះសមត្ថកិច្ចកំពុងមានចំណាត់ការលើករណីនេះហើយ៕