ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា កាលពីរសៀលថ្ងៃទី១៣ ខែកក្កដា ឆ្នាំ២០២៣ម្សិលម៉ិញនេះ នគរបាលមូលដ្ឋានសង្កាត់ស្វាយដង្គុំ ក្រុងសៀមរាប ខេត្តសៀមរាប បានទទួល និងធ្វើការឃាត់ខ្លួនស្ត្រីម្នាក់ពាក់ព័ន្ធករណី «គំរា.មកំហែ.ងថា នឹងធ្វើឲ្យខូចខាត ដោយយកសាំងចំនួន៤ដបទៅប៉ុនប៉ងដុតសណ្ឋាគារ «អូខេវ័នវីឡា» ដើម្បីឲ្យសង្សារចេញមកជួប»។
សេចក្តីរាយការណ៍បន្តថា ស្ត្រីរូបនោះមានឈ្មោះ សីហា ទិត្យាឆរ៉ាវី អាយុ៣៣ឆ្នាំ មុខរបរជាបុគ្គលិកក្រុមហ៊ុន មានទីលំនៅនៅភូមិខ្នារ សង្កាត់ជ្រាវ ក្រុង-ខេត្តសៀមរាប។
បើតាមសាក្សីម្នាក់ដែលជាអាជីវករ បាននិយាយប្រាប់ឱ្យដឹងថា នៅវេលារសៀលថ្ងៃទី១៣ ខែកក្កដា ឆ្នាំ២០២៣ គេបានឃើញឈ្មោះ សីហា ទិត្យាឆរ៉ាវី ជិះម៉ូតូម៉ាកហុងដាឌ្រីម១គ្រឿង ស៊េរីឆ្នាំ២០២០ ពណ៌ខ្មៅ ស្លាកលេខ សៀមរាប១AI.២២៥៣ ទៅកន្លែងលក់ចាប់ហួយ រួចក៏ទិញសាំងចំនួន៤លីត្រច្រកដាក់ថង់ ហើយយកទៅគំរា.មឈ្មោះ ស៊ីន គឹមហេង ឲ្យចេញមកជួបខ្លួន បើមិនមកជួបទេ គេនឹងធ្វើការដុតសណ្ឋាគារ «អូខេវ័នវីឡា» នោះ ចោលតែម្តង។ ប៉ុន្តែនៅពេលស្ត្រីរូបនោះ បាននិងកំពុងតែរៀបចំធ្វើសកម្មភាពប៉ុនប៉ងដុត ក៏ត្រូវបានបុគ្គលិកអូតែលទៅរារាំងទាន់ និងឃាត់ខ្លួននាំទៅកាន់សមត្ថកិច្ចនគរបាលប៉ុស្តិ៍ស្វាយដង្គុំ ក្រុងសៀមរាប ដើម្បីសាកសួរជុំវិញការគំរា.មកំហែ.ងប៉ុនប៉ងដុតភូមិគ្រឹះរបស់គេនោះ។
ហើយនៅចំពោះមុខសមត្ថកិច្ច ស្ត្រីឈ្មោះ សីហា ទិត្យរឆរ៉ាវី បានសារភាពថា «ខ្លួនពិតជាបានទិញសាំងចំនួន៤លីត្រ ក្នុងគោលបំណងយកទៅដុតសណ្ឋាគារ «អូខេវ័នវីឡា» នោះពិតមែន ដើម្បីគំរា.មឲ្យឈ្មោះ ស៊ីន គឹមហេង ចេញមកជួបខ្លួន បើមិនចេញមកទេ ខ្លួននឹងដុតសណ្ឋាគារ «អូខេវ័នវីឡា» នុងចោល»។
តាមសាក្សីម្នាក់ទៀត ក៏បាននិយាយដែរថា កាលពីព្រឹកថ្ងៃទី១៣ ខែកក្កដា ឆ្នាំ២០២៣នោះ ឈ្មោះ ស៊ីន គឹមហេង បានទូរស័ព្ទមកប្រាប់ខ្លួនថា ស្រីស្អាតយកសាំងមកដុតផ្ទះហើយ ហើយក៏បិទទូរស័ព្ទទៅ។ បន្ទាបមក ស្រាប់តែឃើញឈ្មោះ សីហា ទិត្យាឆរ៉ាវី ជិះម៉ូតូម៉ាកហុងដាឌ្រីម ពណ៌ខ្មៅ ចូលភូមិគ្រឹះ «អូខេវ័នវីឡា» ដោយមានកាន់ថង់ខ្មៅមកជាមួយផង។ ពេលនោះទើបប្រជាការពារភូមិ និងកម្លាំងនគរបាលប៉ុស្តិ៍ស្វាយដង្គុំ ធ្វើអន្តរាគមន៍ ដោយមានឈ្មោះ ស៊ីន គឹមហេង ដែលជាប្រុសស្នេហ៍ចេញមុខដែរ និងបាននាំនាងយកទៅវាស់កម្ពស់ និងធ្វើការសម្របសម្រួលនៅប៉ុស្តិ៍សង្កាត់ស្វាយដង្គុំ ដើម្បីបញ្ចប់រឿង ។
ពាក់ព័ន្ធក្នុងករណីខាងលើនេះ សមត្ថកិច្ចបានបញ្ជាក់ថា ជាករណី «គំរា.មកំហែង.ថានឹងធ្វើឲ្យខូចខាតពិតប្រាកដមែន មូលហេតុបណ្តាលមកពីរឿង «ស្នេហា» ដោយសារខាងប្រុសចង់ដោះដៃ និងចង់គេចខ្លួនឈប់ជួបខាងស្រី ទើបធ្វើឱ្យខាងស្រីមានគំនុំ ក៏បង្កជាបញ្ហាកើតឡើងបែបនេះ ហើយខាងស្រីក៏ត្រូវបាននាំទៅវាស់កម្ពស់ផងដែរ៕