បន្ទាប់ពីទទួលព័ត៌មានថា មានម្ចាស់ចំការអំពៅម្នាក់ប្រេីហិង្សាលេី កុមារាអាយុ ១៣ ឆ្នាំ ម្នាក់បណ្ដាលឱ្យសន្លប់រហូតចូលមន្ទីរពេទ្យនោះ លោកឧត្ដមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង បញ្ជាឱ្យសមត្ថកិច្ចក្រោមឱវាទឃាត់ខ្លួនម្ចាស់ចំការភ្លាម ។
ហេតុការណ៍នេះ វាយក្មេងរហូតដល់ចូលពេទ្យនេះ កើតឡើងនៅថ្ងៃទី ១៥ ខែ សីហា ឆ្នាំ ២០២៣ ស្ថិតនៅក្នុង ភូមិ ដូង ឃុំ បាបោង ស្រុក ពាមរក៏ ខេត្ត ព្រៃវែង ។
ក្មេងប្រុសជនរងគ្រោះឈ្មោះ ជឿន ជន អាយុ13 ឆ្នាំ ជាសិស្ស ។ ចំណែកឯ ម្ចាស់ចំការដែលវ៉ៃធ្វើបាបក្មេងនោះ ឈ្មោះ វាសនា រស់នៅភូមិឃុំ ជាមួយក្មេងរងគ្រោះដែរ ។
បើតាមសំដីក្មេងរងគ្រោះបានអោយដឹងថា ដំបូងឡើយ គេនិងក្មេងប្រុសម្នាក់ទៀត បានទៅដើរលេង នៅក្បែរចំការអំពៅនោះ ហើយក៏ស្រេកទឹក ក៏ឃើញអំពៅក៏ចូលទៅកាច់មួយដើមដើម្បីហូបបំបាត់ស្រេកទឹក ស្រាប់តែពេលនោះម្ចាស់ចំការមកទាន់ក៏ចាប់វ៉ៃ ក្មេងរងគ្រោះនោះនឹងអំពៅ វ៉ៃអស់អំពៅមួយដើមក៏កាច់អំពៅមួយដើមទៀតវ៉ៃរហូតឡើងទ្រោមខ្លួន សន្លប់បាត់ស្មារតី ចំណែកក្មេងម្នាក់ទៀតក៏រត់ទៅប្រាប់ឪពុកក្មេងរងគ្រោះ ក៏បញ្ចូន ជនរងគ្រោះទោកាន់មន្ទីពេទ្យភ្លាម ។
ខណៈពេលនេះសមត្ថកិច្ចកំពុងសួរចម្លេីយម្ចាស់ចំការដេីម្បីកសាងសំណុំរឿងបញ្ជូនទៅអយ្យការអមសាលាដំបូងខេត្តព្រៃវែងចាត់ការតាមច្បាប់ ៕