កំពង់ស្ពឺ ៖ ករណីស្ទាវបង្ហោះម៉ូតូធំលេីខ្នងភ្នំគីរីរម្យ ត្រូវបានពលរដ្ឋថតបានរួចបញ្ជូនឲ្យសមត្ថកិច្ចនគរបាល ត្រូវបានសមត្ថកិច្ចស្រាវជ្រាវ និងឃាត់ខ្លួនយកណែនាំ អប់រំ និងធ្វើកិច្ចសន្យាមិនឱ្យធ្វើសកម្មភាពនេះបន្តទៀតទេ ព្រោះបង្កការភ្ញាក់ផ្អេីលដល់ភ្ញៀវទេសចរ ប៉ះពាល់ដល់សណ្ដាប់ធ្នាប់ និងគ្រោះថ្នាក់បំផុត។
ហេតុការណ៍ដែលយុវវជនខាងលើដែលតែងតែធ្វើសកម្មភាពគឺនៅចំណុចលើខ្នងភ្នំគិរីរម្យ ស្ថិតនៅក្នុងភូមិ ថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ ដោយធ្វើសកម្មភាពបង្ហោះម៉ូតូធំ ម៉ាក HONDA CBR កំលាំង 1000CC ពណ៌ខ្មៅ គ្មានផ្លាកលេខ។
បើតាមនគរបាលខេត្តកំពង់ស្ពឺបានឱ្យដឹងថា បន្ទាប់ពីបានឃើញសកម្មភាពនៅក្នុងវីដេអូ កម្លាំងនគរបាលបានធ្វើការស្រាវជ្រាវ និងឃាត់បានម្ចាស់ម៉ូតូខាងលើមានឈ្មោះ ហ៊ុត លីម៉េង ភេទប្រុស អាយុ ២៧ឆ្នាំ មុខរបរលក់ដូរ មានទីលំនៅភូមិស្រល់ ឃុំយាយម៉ៅពេជ្រនិល ស្រុកភ្នំស្រួច ខេត្ដកំពង់ស្ពឺ រួមជាមួយវត្ថុតាងម៉ូតូ នាំមកសាកសួរនៅអធិការរដ្ឋាននគរបាលស្រុកភ្នំស្រួច ។
យោងតាមប្រភពឱ្យដឹងថា ម្ចាស់ម៉ូតូនេះគឺមានជំនាញខាងបង្ហោះម៉ូតូ និងធ្លាប់ធ្វេីសកម្មភាពច្រេីនលេីកច្រើនសារណាស់មកហេីយ ក្នុងពេលធ្វេីសកម្មភាព គឺគេចង់បង្ហាញអំពីទេពកោសល្យ និងទឹកដៃរបស់គេក្នុងការអនុវត្តតាម ប្រព័ន្ធបណ្ដាញ YOUTUBE ហើយបុគ្គលខាងលើបានទទួលស្គាល់ថា សកម្មភាពបង្ហោះម៉ូតូ គឺខ្លួនប្រាកដមែន។
បច្ចុប្បន្នសមត្ថកិច្ចនគរបាលបានធ្វើកិច្ចសន្យាអប់រំណែនាំមិនឱ្យប្រព្រឹត្ដសកម្មភាពបែបនេះជាលេីកបន្ដ ព្រោះនាំអោយមានគ្រោះថ្នាក់ដល់បងប្អូនប្រជាពលរដ្ឋដែលធ្វេីដំណេីរ និងរស់នៅប្រកបអាជីវកម្មនានា ពិសេសភ្ញៀវទេសចរណ៍ជាតិ-អន្តរជាតិ ដែលទង្វេីធ្វេីឱ្យប៉ះពាល់សណ្ដាប់ធ្នាប់សាធារណៈនិងសុវត្ថិភាពសង្គម ៕
