ភ្នំពេញ ៖ បន្ទាប់ពីឃើញរឿងរ៉ាវយុវជនម្នាក់ ជិះម៉ូតូប៉ះឡាន៥៧០ របស់នារីម្នាក់បណ្ដាលឱ្យឆ្កូតថ្នាំកាងក្រោយបន្តិច ធ្វើឱ្យនារីនោះខឹងទះបុរសនោះ៥ដៃ ហើយទាមទារសំណង៥០០ដុល្លារ ស្រាប់តែរសៀល៣០ ខែសីហា ឆ្នាំ២០២៣ ដោយក្ដីអាណិត លោក ផែង វណ្ណ: បានប្រកាសសងលុយជំនួស។
តាមរយៈទំព័រហ្វេសបុករបស់លោក ផែង វណ្ណៈ បានលើកឡើងឱ្យដឹងថា៖
«ជូនទៅក្មួយប្រុស ! ពូបានឃើញ ព័ត៌មានបង្ហោះលេីបណ្ដាញសង្គមហ្វេសប៊ុក ថាក្មួយបេីកបរខ្វះការប្រុងប្រយ័ត្នបណ្ដាលឲ្យប៉ះរថយន្ត ៥៧០ ពណ៌ខ្មៅ ដាច់ថ្នាំកាងបន្តិច ហេីយត្រូវបានស្ត្រីម្ចាស់រថយន្ត ៥៧០ ចុះមកទះ ៥កំផ្លៀង និងដកហូតម៉ូតូយកទៅចាក់សោរទុក ។ តាមការរៀបរាប់របស់សារព័ត៌មាននៅលេីបណ្ដាញសង្គម ក្មួយមានកំហុសតែមួយគត់ តែកំហុសរបស់ក្មួយ គ្រាន់តែសងសំណងការខូចខាតរួចហើយក្មួយគ្មានជាប់ទោសទណ្ឌអ្វីទេ បេីក្មួយគ្មានលទ្ធភាព ពូសុំជួយចេញសងជំនួសទាំងអស់ »។
«ចំពោះទង្វើស្ត្រីម្ចាស់រថយន្ត ៥៧០ ពណ៌ខ្មៅ គាត់មានបទល្មើស ២ ទី១ ប្រេីហិង្សាដោយចេតនា ទី២ ដកហូតម៉ូតូដែលជាវត្ថុតាងករណីគ្រោះថ្នាក់ចរាចរណ៍ ទៅដាក់ច្រវ៉ាក់ទុកខ្លួនឯងដោយគ្មានការអនុញ្ញាតពីតំណាងអយ្យការ គឺជាទង្វេីខុសច្បាប់មួយទៀត ។ ក្មួយមានសិទ្ធិគ្រប់គ្រាន់ដេីម្បីដាក់ពាក្យបណ្ដឹងចំពោះស្ត្រីម្ចាស់រថយន្ត ៥៧០ ពណ៌ខ្មៅនោះ ។ បេីក្មួយគ្មានលទ្ធភាព ពូអាចជួយរកមេធាវី និងនាំក្មួយទៅដាក់ពាក្យបណ្តឹងនៅស្នងការដ្ឋាននគរបាលរាជធានីភ្នំពេញបាន ។ បេីក្មួយត្រូវការជំនួយពីពូ សូមទាក់ទងមកតាម ហ្វេសប៊ុកនេះ ឬ តាម តេឡេក្រាមលេខ ០១២ ៩៣៣ ៨៨៣ សូមអរគុណ !»។
សូមជម្រាបជូនថា ហេតុការណ៍បង្កការភ្ញាក់ផ្អើល នេះផ្ដើមឡើងដោយយុវជនម្នាក់បានចោទប្រកាន់ម្ចាស់ទីតាំង មន្ទីរពហុព្យាបាល និងសម្ភព ឥន្ទ្រទេវី ថាបានទះកំភ្លៀងគាត់៥កំភ្លៀង ហេីយអោយសន្តិសុខ យកសោរច្រវ៉ាក់ចាក់ម៉ូតូជាប់ និងទាមទារ សំណង ៥០០ដុល្លារ ព្រោះ រឿងជិះម៉ូតូលឿនចាប់ហ្វ្រាំងរអិលដួលប៉ះរថយន្ដគាត់ចតស្ងៀមខូចខាតបន្តិចបន្តួច ។ ហេតុការណ៍ នេះបានកើតឡើងកាល ពីវេលាម៉ោង ៥ ព្រឹក ថ្ងៃទី៣០ សីហា ២០២៣ លើផ្លូវទំនប់៧០ ចំណុច មន្ទី មន្ទីរពហុព្យាបាលនិងសម្ភព ឥន្ទ្រទេវី១ ភូមិ បាក់ទូក សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។
