ម្ចាស់ជ័យលាភីលេខ១ កម្មវិធីប្រឡងចម្រៀង «The Voice Cambodia» រដូវកាលទី១ លោក ប៊ុត សីហា និងបក្ខពួកម្នាក់ទៀត ត្រូវបានកម្លាំងនគរបាលស្រុកគងពិសី ខេត្តកំពង់ស្ពឺ ឃាត់ខ្លួននៅម៉ោង០៤និង១០នាទីរសៀលថ្ងៃទី១២ ខែកញ្ញា ឆ្នាំ២០២៣នេះ ពាក់ព័ន្ធនឹងការរក្សាទុកគ្រឿងញៀន នៅចំណុចភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ ។
បើតាមប្រភពព័ត៌មានពីមន្ត្រីនគរបាលស្រុកគងពិសី ថ្លែងប្រាប់សារព័ត៌មានកោះសន្តិភាពបានឱ្យដឹងថា ជនសង្ស័យចំនួន០២នាក់ ដែលសមត្ថកិច្ចឃាត់ខ្លួនរួមមាន ៖
ទី០១- ឈ្មោះ ឆន វល្លិន ភេទ ប្រុស អាយុ៣៨ឆ្នាំមុខរបរមិនពិតប្រាកដ រស់នៅភូមិត្រាំខ្នា ឃុំស្នំក្រពើ ស្រុកគងពិសី។
ទី០២-ឈ្មោះ ប៊ុត សីហា ភេទ ប្រុស អាយុ២៩ឆ្នាំ មុខរបរអ្នកចម្រៀង រស់នៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។
នៅមុនពេលឃាត់ខ្លួន ក្រុមជនសង្ស័យខាងលើនេះ កម្លាំងសមត្ថកិច្ចបានធ្វើការល្បាតតាមមូលដ្ឋាន ដោយប្រទះឃើញក្រុមជនសង្ស័យទាំងពីរនាក់ មានការសង្ស័យ ក៏ឃាត់សួរនាំ ព្រមទាំងឆែកឆេរ ទើបរកឃើញ និងដកហូតបានម្សៅក្រាមពណ៌សថ្លា សង្ស័យជាគ្រឿងញៀន ចំនួន០៥កញ្ចប់ តូចចំនួន០៣ និងមធ្យមចំនួន០២កញ្ចប់, ទូរសព្ទ០៣គ្រឿង និងឧបករណ៍ប្រើប្រាស់គ្រឿងញៀនមួយចំនួនទៀត ។
បច្ចុប្បន្ននេះ ក្រុមជនសង្ស័យ រួមជាមួយវត្ថុតាង ត្រូវបានការិយាល័យជំនាញ កំពុងកសាងសំណុំរឿងចាត់ការបន្តតាមផ្លូវច្បាប់ ។
សូមបញ្ជាក់ថានេះជាលើកទី២ដែលតារាចម្រៀងរូបនេះត្រូវបានសមត្ថកិច្ចឃាត់ខ្លួន ខណៈលើកទី១ការចាប់ខ្លួនលោក ប៊ុត សីហា បានធ្វើឡើងនៅវេលាម៉ោងប្រមាណ ៥ និង៣០នាទីល្ងាច ថ្ងៃទី២១ ខែកុម្ភៈ ឆ្នាំ២០១៨នេះ ស្ថិតនៅមុខសាលាបឋមសិក្សាពងទឹក សង្កាត់ពងទឹក ខណ្ឌដង្កោ រាជធានីភ្នំពេញ។
