មហាជនមានការភ្ញាក់ផ្អើលជាខ្លាំងក្រោយពីសមត្ថកិច្ចឃាត់ខ្លួនបានជនសង្ស័យម្នាក់ ក្នុងករណីឆក់ទូរសព្ទពីតារាសម្តែងស្រីនៅខណ្ឌបឹងកេងកង ដែលជនសង្ស័យរូបនេះមានប្រវត្តិឆក់ជាហូរហែ ព្រមទាំងត្រូវបានសមត្ថកិច្ចបង្ក្រាបបានរួចបញ្ជូលទៅតុលាការផ្ទន្ទាទោសជាច្រើនលើកច្រើនសារមកហើយ។
ជនសង្ស័យដែលទើបត្រូវបានសមត្ថកិច្ចឃាត់ខ្លួនកាលពីថ្ងៃទី ១៨ ខែកញ្ញា ឆ្នាំ២០២៣នេះ មានឈ្មោះ ចាន់ សុខពៅ ហៅ ពៅម៉ាប់ ភេទប្រុស ជនជាតិខ្មែរ ទីលំនៅផ្ទះគ្មានលេខ ផ្លូវលំ ភូមិចោមចៅ សង្កាត់ចោមចៅ២ ខណ្ឌពោធិ៍សែនជ័យ មុខរបរ មិនពិតប្រាកដ (មានសារធាតុញៀន) បានធ្វើសកម្មភាពឆក់ នៅចំណុច SKY ម៉ាស្សា ផ្លូវលេខ៣១០ ភូមិ១ សង្កាត់បឹងកេងកងទី២ ខណ្ឌបឹងកេងកង កាលពីថ្ងៃទី១៥ ខែកញ្ញា ឆ្នាំ២០២៣។
អ្វីដែលកាន់តែហួសចិត្តទៀតនោះ ទោះបីជាធ្លាប់ត្រូវបានផ្ទន្ទាទោសជាប់ពន្ធនាគារច្រើនដងមកហើយក្ដី តែជននេះហាក់មិនកែខ្លួនសោះ ដោយនៅតែបន្តសកម្មភាពឆក់ជាហូរហែ ជាក់ស្ដែងបើយោងតាមដីកាបង្គាប់ឱ្យឃុំខ្លួន កាលពីឆ្នាំ២០១៤ បានឱ្យដឹងថាជននេះ មានប្រវត្តិធ្លាប់ជាប់ពន្ធនាគារមុនដីកានេះទៀត។
ដីកាបង្គាប់ឱ្យឃុំខ្លួនកាលពីឆ្នាំ២០១៦ ត្រូវបានតុលាការសម្រេចឃុំខ្លួនពីបទ «លួចមានស្ថានទម្ងន់ទោស»។
ដីកាបង្គាប់ឱ្យឃុំខ្លួនកាលពីឆ្នាំ២០១៧ ត្រូវបានតុលាការសម្រេចឃុំខ្លួនពីបទ«លួច» ។
ដីកាបង្គាប់ឱ្យឃុំខ្លួនកាលពីឆ្នាំ២០១៩ ត្រូវបានតុលាការសម្រេចឃុំខ្លួនពីបទ «លួចមានស្ថានទម្ងន់ទោស»។
នេះបើយោងតាមដីកាដែលអង្គភាពយើងទទួលបាន ដោយឡែកបច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលខណ្ឌបឹងកេងកង បណ្ដោះអាសន្ន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវីធីច្បាប់៕
