ផឹកស៊ីចាក់ធុងបាសបង្កសំឡេងរំខានដល់អ្នកជិតខាង សមត្ថកិច្ចចុះអប់រំណែនាំ បែរជាស្ដីបន្ទោសសមត្ថកិច្ច និងអួតខ្លួនថា «ជាថ្នាក់លើ និងខ្សែធំណាស់» ត្រូវបានសមត្ថកិច្ច ខណ្ឌសែនសុខ ទាំងកណ្ដាលរាត្រីតែម្ដង។
ការចុះឃាត់ខ្លួនមនុស្សប្រុសស្រី ៥នាក់នេះ ធ្វើឡើងកាលពីវេលាម៉ោង១ និង២០នាទីរំលងអធ្រាត្រឈានចូលថ្ងៃទី២៨ ខែកញ្ញា ឆ្នាំ២០២៣ នៅត្រង់ចំណុចក្បែរផ្សារក្រមួនតាម បណ្ដោយផ្លូវ១៩៧៤ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
បើតាមប្រភពពីសមត្ថកិច្ច បានរៀបរាប់ឱ្យដឹងថា មុននឹងឈានដល់ការឃាត់ក្រុមអ្នកផឹកស៊ីទាំងនោះ គឺមានប្រជាពលរដ្ឋបានទូរស័ព្ទរាយការណ៍មកថា មានមនុស្សមួយក្រុមបានជួបជុំផឹកស៊ីកម្សាន្ដសប្បាយ ដោយមានការចាក់ធុងបាសឮៗ នៅវេលាយប់រំលងអធ្រាត្រទៅហើយ នៅតែមិនព្រមឈប់ទៀត ជាហេតុបង្កសំឡេងរំខានយ៉ាងខ្លាំងៗ។
សមត្ថកិច្ចបន្តថា បន្ទាប់ពីទទួលបានការរាយការណ៍ពីប្រជាពលរដ្ឋភ្លាម ទើបកម្លាំងសមត្ថកិច្ចចុះទៅដល់ទីតាំងកើតហេតុភ្លាមៗ និងបានស្នើសុំឱ្យក្រុមអ្នកផឹកស៊ីទាំងនោះ បញ្ឈប់ការចាក់ធុងបាសដែលបង្កការរំខានដល់អ្នកជិតខាងទៀត បន្ទាប់មក សមត្ថកិច្ចក៏ជិះចេញពីទីនោះដើម្បីបន្តការជិះល្បាតនៅក្នុងមូលដ្ឋានជាបន្តទៀត មួយសន្ទុះក្រោយមក ក៏មានប្រជាពលរដ្ឋទូរស័ព្ទរាយការណ៍ទៅសមត្ថកិច្ចម្តងទៀតថា ក្រុមអ្នកផឹកស៊ីទាំងនោះនៅតែបន្តចាក់ធុងបាសឮៗ រំខានមិនទាន់ឈប់ទេ ។
សមត្ថកិច្ចបន្តទៀតថា សមត្ថកិច្ចក៏ចុះទៅជាលើកទី២ និងបានស្នើសុំទៅពួកគេជាលើកទី២ តែក្រុមអ្នកផឹកស៊ីទាំងនោះ បែរជាស្ដីសន្ទោស និងជេរប្រមា.ថទៅលើសមត្ថកិច្ចថា «ផឹកស៊ីតិចតួចមិនបាន» និងបានអួតខ្លួនថា «ជាថ្នាក់លើ និងខ្សែធំណាស់» ថែមទាំងមិនស្ដាប់សមត្ថកិច្ច ព្រមទាំងស្រែកឡូឡាផ្អើលគេឯងទាំងកណ្ដាលរាត្រី ទើបសមត្ថកិច្ចធ្វើការឃាត់ខ្លួនអ្នកផឹកស៊ីទាំងនោះភ្លាមតែម្ដង។
បច្ចុប្បន្ន ក្រុមអ្នកផឹកទាំង៥នាក់ ក្នុងនោះមានស្រីម្នាក់ ត្រូវបានសមត្ថកិច្ចនាំខ្លួនយកទៅកាន់តែប៉ុស្ដិ៍នគរបាលរដ្ឋបាលភ្នំពេញថ្មី ដើម្បីចាត់ការទៅតាមនីតិវិធី៕