មានការរំជួលចិត្តជាខ្លាំងក្រោយពីបានឃើញតារាចម្រៀង ស៊ឹម ថៃណា បានប្រកាសរកក្មួយប្រុសដែលបានបាត់ខ្លួនកាលពីថ្ងៃទី១៤ នៅខេត្តបន្ទាយមានជ័យ។ ប៉ុន្តែក្រោយមកក៏បានរកឃើញវិញតែគួរឱ្យស្តាយបានត្រឹមតែសាកសពដែលធ្វើឱ្យនាងជាម្តាយមីង និងក្រុមគ្រួសារមានការរន្ធត់ចិត្តជាខ្លាំង ។
គេចាំបានថាថ្ងៃទី ១៤ កន្លងទៅ ស៊ឺម ថៃណា បានបង្ហោះសាររកក្មួយប្រុសដែលបានបាត់ដំណឹង នៅក្នុងតំបន់សំណង់ព្រែកសឿ ខេត្តបន្ទាយមានជ័យប្រមាណជាម៉ោងពីររសៀល ។ ប៉ុន្តែរំលងមិនបានប៉ុន្មានផង ស៊ឹម ថៃណា ក៏បានឱ្យដឹងថាក្មួយប្រុសដែលបាត់ខ្លួននោះបានទទួលមរណភាពហើយ ដោយនាងបានបញ្ជាក់មូលហេតុថាក្មួយប្រុសស្លាប់ដោយសារលង់ទឹក ។ ការបាត់បង់ក្មួយប្រុសដែលធ្លាប់រស់នៅជាមួយតាំងពីតូចដែលប្រៀបដូចជាកូនយ៉ាងលឿនបែបនេះបានធ្វើឱ្យ ស៊ឹម ថៃណា រន្ធត់ចិត្តជាខ្លាំង។
ភ្ជាប់ជាមួយរូបភាពរបស់ក្មួយប្រុសនៅក្នុងពិធីបុណ្យសព ស៊ឹម ថៃណា បានរៀបរាប់ថា «ឆ្នាំ2018 ជាឆ្នាំដែលឈឺចាប់បំផុត(បាត់បង់ម្តាយ)ឆ្នាំ2023 ឈឺចាប់ម្តងទៀត(បាត់បង់ក្មួយ)មីងចុកបេះដូងណាស់ 24ឆ្នាំរស់នៅដូចម៉ែកូន មិនដែលឃ្លាតទេ តែពេលនេះឃ្លាតទៅគ្មានថ្ងៃវិលវិញសូមទៅកាន់សុគតិភពណាក្មួយមីង ជាតិក្រោយសុំអោយអាយុវែងក្មួយប្រុសឈ្មោះ ឈឿន ពេជ្ជរ៉ា ហៅតួ បានទទួលមរណ:ភាព (លង់ទឹក) ថ្ងៃ១៥ ខែតុលា(១០) ឆ្នាំ២០២៣។
ការបាត់បង់ក្មួយប្រុសជាទីស្រឡាញ់របស់ ស៊ឹម ថៃណា ក៏ទទួលបានការចូលរួមរំលែកទុក្ខនិងសោកស្តាយពីសំណាក់មិត្តភក្តិទាំងក្នុងនិងក្រៅសិល្បៈជាច្រើននឹងឧទ្ទិសឱ្យវិញ្ញាណក្ខន្ធសព បានដល់ទីស្ងប់សុខនឹងមានអាយុវែងនៅក្នុងជាតិថ្មី៕