ខណៈតារាកំប្លែង នាយពាក់មី បានចេញមុខបង្ហាញការមិនពេញចិត្តចំពោះការប្រកួតប្រដាល់គុនខ្មែរអន្តរជាតិរវាងគូឯកកីឡាករកម្ពុជា ព្រំ សំណាង និងកីឡាករភូមា ដាវ លីឌុច កាលយប់មិញនេះដោយលើកឡើងចំៗទៅលើកីឡាករ ព្រំ សំណាង ថាមិនវ៉ៃសោះទាត់ជើងគេតិច ..។ ស្រាប់តែមានគណនីយហ្វេសប៊ុកមួយលើកឡើងថាលេងតែកំប្លែងមិនដែលឃើញជួយអីគុនខ្មែរ តែមិនទុកយូរ នាយពាក់មី បានតបវិញភ្លាមៗថាពេលលោកលេងកំប្លែងមិនកើតគេក៏រិៈគន់ដែរ...។
ការប្រកួតប្រដាល់គុនខ្មែរអន្តរជាតិរវាងកីឡាករកម្ពុជានិងកីឡាករអន្តរជាតិជាច្រើនគូបានបញ្ចប់ទៅ កាលពីថ្ងៃទី០៥ យប់មិញនេះ តែគូឯកដែលទទួលបានការបញ្ចេញមតិវែកញែកជាបន្តបន្ទាប់នោះគឺគូកីឡាករ ព្រំ សំណាង និងកីឡាករភូមា ដាវ លីឌុច ដែលលទ្ធផលអ្នកទាំងពីរស្មើគ្នា។
ក្នុងនោះលទ្ធផលមួយនេះក៏ត្រូវបានទស្សនិកជនជាច្រើនដែលមានទាំងអ្នកសិល្បៈមួយចំនួនបានបញ្ចេញមតិជាច្រើនចំពោះកីឡាករ ព្រំ សំណាង ។ ជាក់ស្តែង នាយពាក់មី បានបង្ហោះសារជាហូរហែថា«ខំចាំមើល ព្រំ សំណាង វ៉ៃ អត់វ៉ៃសោះ ទាត់ជើងគេតិចតិច គេចរហូត ? ? ឯណាក្បាច់គុណបូរាណខ្មែរ ? ម៉េចមិនបញ្ចេញ ?» ។ មតិរបស់ នាយពាក់មី ក៏មានទាំងអ្នកគាំទ្រនិងអ្នកមិនពេញចិត្តដោយក្នុងនោះគណនីយមួយបានតបមកតារាកំប្លែងរូបនេះថា « លេងតែកំប្លែងទៅព្រោះមិនដែលឃើញជួយអីគុនខ្មែរផង»។
មិនរង់ចាំយូរតារាកំប្លែងដែលមានដើមកំណើតមកពីខេត្តស្វាយរៀងរូបនេះបានតបទៅវិញថា «លេងកំប្លែង អត់អោយមើលប្រដាល់ទេអី? មើលហើយ ឃើញអត់វ៉ៃ ថាអត់វ៉ៃ និយាយតាមមើលឃើញតើ ខ្ញុំលេងកំប្លែងមិនកើត មិនល្អរក៏បងប្អូនរិះគន់ដែរ ! ហើយទាល់តែខ្ញុំជួយគុនខ្មែរ ទើបមានសិទ្ធនិយាយបានមែន»។ទោះបីជាយ៉ាងនេះក្តីក៏មានការលើកឡើងថាគួរតែមានការលើកទឹកចិត្តគុនខ្មែរព្រោះថាគុនខ្មែរឈឺសាច់ខុសពីលេងកំប្លែង៕
