មានការចាប់អារម្មណ៍ខ្លាំងដោយថ្មីៗនេះតារាចម្រៀងសំឡេងផ្អែម ម៉េង កែវពេជ្ជតា បានចេញមុខបញ្ជាក់ច្បាស់ៗថាបទចម្រៀង«បងល្អលើសគេ» ជាបទរបស់បងស្រីអ្នកនាងគឺអ្នកស្រី ម៉េង កែវពេជ្ជបុប្ជា មិនមែនជាបទរបស់ ទូច ស៊ុននិច ឡើយ ។ លើសពីនេះតារាចម្រៀង ម៉េង កែវពេជ្ជតា ក៏ស្នើសុំឱ្យមានការកែតម្រូវឈ្មោះឡើងវិញព្រោះអ្នកនាងមិនដឹងច្បាស់ថាជាចេតនាបន្លំឬលេងសើចឡើយ។
តារាចម្រៀង ម៉េង កែវពេជ្ជតា បានបង្ហោះសាររៀបរាប់ថា «បទ«បងល្អលើសគេ» ជាបទចម្រៀងល្បីខ្លាំង និងមានអាយុកាលជិតសាមសិបឆ្នាំហើយ ដែលសំនៀងដើមរបស់បងស្រីធំ ម៉េង កែវពេជ្របុប្ផា ជាបុត្រីច្បងនៃស្តេចទ្រសោ ម៉េង ហ៊ុន និងរាជនីអាយ៉ៃ កែវ សង្វាពេជ្រ ក៏ជាតារាចម្រៀងមួយដួងដែលមានកេរ្ត៍ឈ្មោះថ្លៃថ្នូរដោយសារមានបទចម្រៀងល្បីៗផ្ទាល់ខ្លួនជាច្រើនបទ យើងបានឃើញ Channel YouTube ពីរនេះយកសំនៀងរបស់បងស្រី ម៉េង កែវពេជ្របុប្ផា ប៉ុន្តែដាក់ឈ្មោះអ្នកផ្សេង ? ។ លើសពេកហើយ ! មិនដឹងថាជាចេតនាចង់បន្លំ ចង់លេងសើច ឬជាអចេតនាទេ ។ ប៉ុន្តែបើទោះជាក្នុងករណីណាក្តី យើងសំណូមពរដល់ម្ចាស់ YouTube Channel ទាំងពីរ និងផ្សេងៗទៀត មេត្តាកុំលេងបែបនេះ សូមកែតម្រូវវិញផង ។
រស់លើផែនដីតែមួយ ជាខ្មែរតែមួយ គួរកុំបំផ្លាញគេដើម្បីខ្លួនឯងមិនល្អទេ»។
ការលើកឡើងរបស់អ្នកនាង ម៉េង កែវពេជ្ជតា ក៏ត្រូវបានអ្នកលេងបណ្តាញសង្គមមួយចំនួនចូលទៅបញ្ចេញមតិដោយបានលើកឡើងថាបើទោះដាក់រូបអតីតារាចម្រៀង ទូច ស៊ុននិច ក្តី តែសំឡេងរបស់អ្នកស្រី ម៉េង កែវពេជ្ជបុប្ជា និង ទូច ស៊ុននិច ស្តាប់ទៅមិនដូចគ្នាទេ។ ជាមួយគ្នានោះអ្នកនាង ម៉េង កែវពេជ្ជតា ក៏ទទូចឱ្យ អ្នកយកបទចម្រៀងបងស្រី អ្នកស្រី ម៉េង កែវពេជ្ជបុប្ជា ទៅច្រៀងCoverឬកែចង្វាក់ថ្មីគួរតែផ្តល់តម្លៃដល់ម្ចាស់សំនៀងដើមផង ៕
