ក្រោយពីអ្នកនាង ស្រីអូន បានប្រកាសទាមទាររថយន្តទំនើបម៉ាកឡិចស៊ីស៥៧០ ពីសំណាក់ក្រុមគ្រួសារសាច់ថ្លៃដោយទុកឱកាសឱ្យរយៈពេលបីថ្ងៃត្រឹមថ្ងៃទី ២០នោះពេលនេះអតីតអ្នកម្តាយក្មេកអ្នកស្រី ហ្គិចលី ក៏បានតបមក ស្រីអូន វិញ ព្រោះមិនចង់ឱ្យវែងឆ្ងាយតាមបណ្តាញសង្គមតទៅទៀត។
គេចាំបានថាកាលពីប៉ុន្មានថ្ងៃមុនអ្នកនាង ស្រីអូន បានប្រកាសទាមទាររថយន្តស្វាមី ឈាង រ័ត្ន ត្រឡប់មកវិញដោយទុកពេលឱ្យបីថ្ងៃបើមិនឃើញយករថយន្តមកវិញនឹងមានរឿងបន្តទៀត ។ ឆ្លើយតបជាមួយកូនប្រសារអ្នកស្រី ហ្គិចលី ថាទ្រព្យដែលនៅជាប់ជាមួយកូនប្រុស ឈាង រ័ត្ន អ្នកស្រីជាអ្នកចាត់ចែង ដោយក្នុងនោះអ្នកស្រីបានរៀបរាប់ថា«សូមជម្រាបសួរពុកម៉ែបងប្អូនកូនក្មួយទាំងអស់នៅក្នុងបណ្ដាញសង្គមហ្វេសប៊ុកសម្រាប់សំណេរមួយនេះ ខ្ញុំសូមផ្ញើជូនកូនប្រសាររបស់ខ្ញុំ គឺកូន នួន ស៊ុន្ទរី ហៅស្រីអូនពាក់ព័ន្ធជាមួយនឹងទ្រព្យដែលកូនប្រុសរបស់ម៉ែត្រូវជាប្ដីរបស់កូនយកមកជាប់នឹងខ្លួនមុននឹងស្លាប់នៅផ្ទះម៉ែ គឺម៉ែជាអ្នកចាត់ចែង។
មិនមានការពាក់ព័ន្ធជាមួយនឹងកូនៗនិងសាច់ញាតិណាផ្សេងទេ។បើកូនចង់ដឹងច្បាស់អាចទាក់ទងមកម៉ែផ្ទាល់បានព្រោះលេខទូរសព្ទម៉ែកូនស្គាល់ស្រាប់ហើយ។ដើម្បីកុំអោយវែងឆ្ងាយតាមបណ្ដា ញសង្គម ហ្វេសប៊ុក តទៅទៀត។ ព្រោះតាំងពីកូនប្រុសម៉ែបានស្លាប់មក កូនប្រាប់ថាចង់ជួបជាមួយប្អូនប្រុស មាស រិទ្ធី និង ជួបជាមួយម៉ែ ប៉ុន្តែយើងមិនទាន់ដែលបានជួបគ្នាទាល់តែសោះសូមអគុណ»។
ជាមួយការលើកឡើងរបស់អ្នកម្តាយក្មេក ឈាង រ័ត្ន គេមិនទាន់បានឃើញអ្នកនាង ស្រីអូន តបវិញឡើយ ដោយសារអ្នកនាងកំពុងជាប់រវល់មើលថែទាំ ស្រីតូច ដែលកំពុងមានបញ្ហាសុខភាព ។ ទោះបីជាយ៉ាងនេះក្តីមានការរំពឹងថារឿងរ៉ាវរបស់ ស្រីអូន និងក្រុមគ្រួសារខាងស្វាមី នឹងបញ្ចប់នៅក្នុងពេលឆាប់ៗនេះក្រោយពីមានការបើកភ្លើងខៀវពីសំណាក់ម្តាយក្មេកដើម្បីចចារបញ្ចប់សាច់រឿង៕