តារាចម្រៀងជើងចាស់ ម៉េង កែវពេជ្ជតា បានចេញមុខសរសើរដល់ភាពក្លាហានរបស់តារាចម្រៀង ពេជ្រ សោភា ដែលហ៊ាននិយាយការពិត។ ការលើកឡើងរបស់អ្នកនាង ម៉េង កែវពេជ្ជតា បែបនេះក្រោយតារាចម្រៀង ពេជ្រ សោភា បាននិយាយថាមិនចង់ឱ្យរូបថតរបស់ខ្លួននៅមុខអ្នកនាង ម៉េង កែវពេជ្ជតា ទេព្រោះអ្នកនាងជាតារាចម្រៀងរៀមច្បងដែលមានឈ្មោះល្បីម្នាក់ ។
គេចាំបានថាថ្មីៗនេះមានតារាចម្រៀងប្រចាំផលិតកម្មហង្សមាស ពេជ្រ សោភា បានចេញមុខរៀបរាប់ថានាងមិនសប្បាយចិត្តពេលដែលឃើញរូបភាពរបស់ខ្លួននៅមុខនិងធំជាងអ្នកនាង ម៉េង កែវពេជ្ជតា ព្រោះបើប្រៀបធៀបខ្លួនពិតជានៅក្មេងខ្ចីនៅក្នុងវិស័យសិល្បៈ។
ពេជ្រ សោភា បានបន្ថែមថានាងស្គាល់ទីតាំងដែលខ្លួននៅត្រង់ចំណុចណា ដូច្នេះបើគេដាក់រូបនាងនៅមុខឬធំជាងតារាចម្រៀង ម៉េង កែវពេជ្ជតា នាងពិតជាខ្មាស់ខ្លួនឯងខ្លាំងណាស់។ ជាមួយនឹងការលើកឡើងរបស់ ពេជ្រ សោភា បានធ្វើឱ្យ ម្ចាស់បទ«ស្នេហ៍ប្រុសង៉ក់ង» រូបនេះមានការរំភើបចិត្តជាខ្លាំង នឹងបានតបទៅ ពេជ្រ សោភា វិញភ្លាមៗ ។
តារាចម្រៀង ម៉េង កែវពេជ្ជតា បានរៀបរាប់ថា «អរគុណប្អនស្រី ពេជ្រ សោភា និងសូមសរសើរនូវភាពក្លាហានរបស់ប្អូនស្រីនិយាយការពិត ។ ពីមុនមានជនខិលខូចមួយក្រុមបានចូលមកបញ្ឆេះកំហឹងអោយខ្ញុំស្អប់គាត់ និងអោយគាត់ស្អប់ខ្ញុំ ។
ពួកគេបានប្រើមធ្យោបាយដ៏ថោកទាបបង្កើតពាក្យឈ្លោះឆ្លងឆ្លើយអោយខ្ញុំ និងតារាផ្សេងៗទៀតយល់ច្រលំខឹងគ្នា និងបានធ្វើអោយទស្សនិកជនស្អប់ខ្ញុំ ថាខ្ញុំមិនដែលចេះត្រូវនឹងនរណា តែតាមការពិត ដូចបងប្អូនបានឃើញស្រាប់ ។ អរគុណបងៗប្អូនៗអ្នកសិល្បះ អរគុណមនុស្សល្អៗ អរគុណពេលវេលា ដែលជាអ្នកបញ្ជាក់អោយខ្ញុំយ៉ាងត្រជាក់ ។ ជូនពរប្អូនស្រី ពេជ្រ សោភា និងពុកម៉ែបងប្អូន ក្រុមគ្រួសារ សូមមានក្តីសុខសុភមង្គលឈ្នះអស់មារសត្រូវ និងកាន់តែមានហ្វ៊ែនច្រើនៗបន្តទៀត»៕