តារាសម្តែងនិងចម្រៀងលោក បញ្ញា សិទ្ធ មានការតក់ស្លុតនិងសោកសង្រេងជាខ្លាំងដោយក្មួយស្រីបង្កើតរបស់លោកម្នាក់បានស្លាប់បាត់បង់ជីវិតកាលពីថ្ងៃទី ០៨ ម្សិលមិញនេះដោយ សារលង់ទឹក ។
ក្រៅពីក្មួយស្រីរបស់លោក បញ្ញា សិទ្ធ ក៏មានមិត្តភក្តិរបស់ក្មេងស្រីពីរនាក់ទៀតក៏បានរងគ្រោះដល់ជីវិតក្នុងហេតុការណ៍នេះដែរ ។
កាលពីប៉ុន្មានម៉ោងមុននេះលោក បញ្ញា សិទ្ធ បានឡាយវីដេអូដោយរៀបរាប់ថាក្មួយស្រីរបស់លោកបានលង់ទឹកស្លាប់ជាមួយមិត្តភក្តិពីរនាក់ទៀតក្នុងពេលតែមួយ ។
បើតាមការលើកឡើងរបស់តារាប្រុសរូបនេះបានឱ្យដឹងថាក្មួយស្រីរបស់លោកមានអាយុ ១២ឆ្នាំ ជាកូនស្រីរបស់បងប្រុសបង្កើតលោកដែលរស់នៅជាមួយលោកតាំងពីក្មេងព្រោះឳពុកម្តាយនាងបានទៅរស់នៅប្រទេសថៃ ។
លោក បញ្ញា សិទ្ធ បានបន្ថែមថាលោកទើបមកពីប្រទេសថៃភ្លាមក៏ដើររក្មួយស្រី ទីបំផុតទើបដឹងថាក្មួយស្រីបានលង់ទឹកស្លាប់ជាមួយមិត្តភក្តិរបស់គេដែលមានអាយុ ១២ឆ្នាំ ដូចគ្នា ។ ក្មួយស្រីរបស់លោកបានចាកចេញពីផ្ទះវេលាម៉ោងប្រមាណ៩ព្រឹកថ្ងៃទី ០៨ហើយនៅពេលល្ងាចទើបក្រុមគ្រួសារដើររក ។
បើតាមការបង្ហោះរបស់ឯកឧត្តម គួច ចំរើន នៅក្នុងថ្ងៃទី ០៩នេះបានឱ្យដឹងថា យប់មិញពិតជារន្ធត់ចិត្តជាខ្លាំង ក្រោយទទួលបានដំណឹងថា មានប្រជាជននៅសង្កាត់រកាខ្ពស់ ក្រុងតាខ្មៅ បាត់ខ្លួន កូនៗចំនួន ៣ នាក់ (អាយុ១២;១៣ឆ្នាំ)និង ឃើញតែស្បែកជើង និង អាវនៅមាត់ស្រះទឹក ។
រដ្ឋបាលខេត្ត ក្រុងស្រុក និង កងកំលាំងចំរុះ បានទៅដល់ ហើយរកអ្នកចេះមុជទឹក បង់សំណាញ់ រាវរកក្នុងស្រះ បានឃើញ តែអកុសល ក្មួយៗទាំង ៣ បានផុតជីវិតអស់ហើយ ។ សូមបួងសួង អោយវិញ្ញាណក្ខន្ធ ក្មួយៗបានទៅកាន់សុគតិភព ។ សូមឪពុកម្ដាយ អណាព្យាបាល មើលថែកូនៗអោយបានល្អ ។
ពេលនេះសពក្មួយស្រីរួមនឹងមិត្តភក្តិចំនួនពីរនាក់ទៀតរបស់លោក បញ្ញា សិទ្ធ កំពុងធ្វើបុណ្យទៅតាមព្រះពុទ្ធសាសនានៅក្នុងវត្តតាំងក្រសាំងដែលស្ថិតនៅក្នុងក្រុងតាខ្មៅ។ពួកគេធ្វើបុណ្យ និងបូជារួមគ្នាដោយសារស្លាប់ក្នុងពេលតែមួយហើយអ្វីដែលចៃដន្យគឺមានអាយុ ១២ឆ្នាំដូចគ្នាថែមទៀត ។
នេះជាការលើកឡើងរបស់លោក បញ្ញា សិទ្ធ ។ ជាមួយនឹងការបាត់បង់ក្មួយស្រីជាទីស្រឡាញ់របស់លោក បញ្ញា សិទ្ធ ក៏ត្រូវបានមិត្តភក្តិក្នុងនិងក្រៅសិល្បៈចូលរួមសោកស្តាយ និងរំលែកទុក្ខគ្រប់គ្នា ៕