ក្នុងនាមជាបងប្រុសលោក ជី ដេវីត បានបង្ហាញនូវអារម្មណ៍រំភើបជាខ្លាំងក្រោយបានឃើញប្អូនស្រីរបស់លោកទទួលជោគជ័យនូវក្នុងការសិក្សាបែបនេះ។តារារ៉េបរូបនេះបានពោលពាក្យបែបនេះនៅក្នុងបណ្តាញសង្គមក្រោយប្អូនស្រីបានអាហារូបករណ៍ថ្នាក់អនុបណ្ឌិតនៅសាកលវិទ្យាល័យមួយនៅសហរដ្ឋអាមេរិក ។
ថ្មីៗនេះមហាវិទ្យាល័យបុរាណវិទ្យាបានប្រកាសដំណឹងរីករាយមួយជូនដល់អតីតនិស្សិតបុរាណវិទ្យា ០២ រូបដែលនិស្សិតម្នាក់ក្នុងចំណោមនិស្សិត ទាំងពីរ ជាប្អូនស្រីបង្កើតរបស់តារារ៉េប ជី ដេវីត គឺកញ្ញា ងួន ចាន់ដារីយ៉ាដែលនឹងត្រូវទទួលបានអាហារូបករណ៍ថ្នាក់អនុបណ្ឌិតនៅសាកលវិទ្យាល័យ ហាវ៉ៃនៅ ម៉ាណូអា សហរដ្ឋអាមេរិក។ ជាមួយនឹងការបង្ហោះនូវលទ្ធផលរបស់ប្អូនស្រីតារារ៉េបរូបរាងខ្ពស់ស្រឡះរូបនេះបានរៀបរាប់ថា«អបអរសាទរ ងួន ចាន់ដារីយ៉ា ចាប់ឱកាសបន្តយកបណ្ឌិតហើយត្រលប់មកបម្រើមាតុភូមិយើងវិញ។អ្នកបានធ្វើអោយការម្រេចចិត្តរបស់ខ្ញុំកាលពី 13ឆ្នាំមុនជាការសម្រេចចិត្តដ៏អស្ចារ្យបំផុតក្នុងជីវិតខ្ញុំនេះ បងប្រុសមានមោទកភាពណាស់ អរគុណដែលគោរពពាក្យសន្យាដោយឆន្ទៈដ៏ខ្ពង់ខ្ពស់បំផុត »។
ជុំវិញការលើកឡើងរបស់តារារ៉េប ជី ដេវីត បានធ្វើឱ្យអ្នកគាំទ្រជាច្រើនរបស់តារារូបនេះមានការលាន់មាត់សរសើរនិងជូនពរដល់ប្អូនស្រីលោកគ្រប់គ្នា ។ ក្នុងនោះគេក៏បានឃើញកញ្ញា ងួន ចាន់ដារីយ៉ា បានបង្ហាញនូវអារម្មណ៍រីករាយ និងអរគុណដល់បងប្រុសដែលតែងតែងផ្តល់កម្លាំងចិត្តនិងទំនុកបំរុងចំពោះការសិក្សារបស់ខ្លួនដែលធ្វើឱ្យនាងជោគជ័យនិងមានថ្ងៃនេះ ។ បើតាមការបង្ហើបពីសំណាក់ប្រភពជិតស្និទ្ធរបស់លោក ជី ដេវីត បានឱ្យដឹងថាលោក ជី ដេវីត ស្រឡាញ់ប្អូនស្រីខ្លាំងណាស់លោកតែងជួយឧបត្ថម្ភសម្រាប់ការសិក្សារបស់ប្អូនស្រីស្ទើរតែអាចនិយាយថាលោកជាឪពុកទីពីរថែមទៀតផង ។ ប៉ុន្តែលោកក៏មិនខកបំណងដោយសារពេលនេះលោកក៏ទទួលបានលទ្ធផលគាប់ចិត្តពីប្អូនស្រីហើយ។ ជារៀងរាល់ឆ្នាំគេតែងឃើញលោក ជី ដេវីត ធ្វើពិធីខួបកំណើតឱ្យប្អូនស្រីយ៉ាងកក់ក្តៅមិនដែលរំលងមួយឆ្នាំណាឡើយ៕