អ្នកគាំទ្ររបស់តារាសម្តែងរូបសង្ហា ខាត់ វ៉ៃហាំង បានបង្ហាញការរំភើបចំពោះទឹកចិត្តចែករំលែករបស់តារាប្រុសម្នាក់នេះដែលមិនមើលនឹងភ្នែកសុខចិត្តឈប់រថយន្តឱ្យឆ័ត្រដល់ក្រុមគ្រួសារមួយដែលមានកូនតូចធ្វើដំណើរតាមដងផ្លូវក្រោមដំណក់ទឹកភ្លៀង ។ អ្វីដែលគួរឱ្យសរសើរលោក ខាត់ វ៉ៃហាំង បានលើកឡើងថាមិនមែនមានតែលោកទេដែលធ្វើរឿងល្អនេះប្រសិនបើបងប្អូនទាំងអស់គ្នាអាចនឹងជួយបានច្រើនជាងលោកទៅទៀត ។
តាមរយៈវីដេអូខ្លីមួយរបស់លោក ខាត់ វ៉ៃហាំង កំពុងត្រូវបានអ្នកគាំទ្រជាច្រើនលាន់មាត់សរសើរនិងស៊ែរតៗគ្នាក្រោយឃើញសកម្មភាពចែករំលែករបស់តារាប្រុសរូបនេះចំពោះប្តីប្រពន្ធមួយគូដែលមានកូនតូចធ្វើដំណើរនៅតាមដងផ្លូវដោយជិះរឺម៉កទាំងមេឃកំពុងភ្លៀងដោយមិនមានការពាក់អាវភ្លៀងនោះទេ ឃើញរូបភាពបែបនេះលោក ខាត់ វៃហាំង មិនបានមើលរំលងទេលោកបានយកឆ័ត្រនៅក្នុងរថយន្ត ទៅឱ្យប្តីប្រពន្ធដែលជិះរឺម៉កនោះ ។តាមរយៈវីដេអូននេះយើងសង្កេតឃើញថាក្រោយពីទទួលបានឆ័ត្ររបស់តារាសម្តែង ខាត់ វ៉ៃហាំង ភ្លាម ស្រ្តីរូបនេះបានបង្ហាញទឹកមុខរំភើបជាខ្លាំងចំពោះសកម្មភាពចែករំលែករបស់តារាប្រុសរូបនេះ។
ជាមួយនឹងទិដ្ឋភាពមួយនេះលោក ខាត់ វ៉ៃហាំង បានរៀបរាប់ថា «សុំទោសផងណា បងប្អូន ព្រោះពេលនោះពេលវេលាខ្លីណាស់ប្រញ៉ាប់ពេករកអីជួយពួកគាត់មិនបានច្រើនទេមានតែប៉ុណ្ណឹងដឹងតែម្យ៉ាងភ្នែកប្រាប់បេះដូងថា ពួកគាត់ និងកូនគាត់ពីរនាក់កំពុងតែ រងារខ្ញុំជឿថាបើជាបងប្អូនទាំងអស់គ្នាវិញឃើញបែបនេះក៏ចែករំលេកដូចគ្នាតែអាចនិងជួយពួកគាត់បាន ច្រើនជាងខ្ញុំផងព្រោះមានបងប្អូនមនុស្សធម៌ច្រើនណាស់ដែលខ្ញុំបានឃើញក្ដីសុខគឺចេញពីចិត្ត និង បេះដូងយើងតើ»។
បើតាមការលើកឡើងរបស់លោក ខាត់ វ៉ៃហាំង វីដេអូមួយនេះមិនមែនជាការសម្តែងទេគឺជាទឹកចិត្តរបស់លោកពិតៗដែលចែករំលែកទៅតាមលទ្ធភាពអាចធ្វើបាន។ ត្រឹមតែជាអំពើសាមញ្ញដែលចេញពីចិត្តមួយនេះរបស់តារាសម្តែង ខាត់ វ៉ៃហាំង បានធ្វើឱ្យមហាជនជាច្រើនពេញចិត្តនឹងលាន់មាត់សរសើរដល់ទឹកចិត្តចែករំលែករបស់លោកគ្រប់គ្នា ។ គួរឱ្យដឹងដែរថាលោក ខាត់ វ៉ៃហាំង គឺជាតារាសម្តែងដែលមានប្រជាប្រិយភាពខ្លាំងនៅក្នុងប្រទេសដែលលោកលេចមុខនៅក្នុងការសម្តែងរឿងរួមនឹងការថតស្ប៉តផ្សព្វផ្សាយផលិតផលជាច្រើន៕
