នៅក្នុងថ្ងៃទី ២៥ខាងមុខនេះតារាសម្តែង វី វុទ្ធី នឹងចូលរួមប្រកួតកីឡាកាយវប្បកម្មនៅក្នុងប្រទេសហ្វីលីពីនជាមួយមិត្តភក្តិបីរូបផ្សេងទៀត ។ ជាមួយនឹងការចាកចេញទៅប្រកួតនៅក្រៅប្រទេសរបស់តារាសម្តែងរូបនេះក៏ទទួលបានការជូនពរនិងលើកទឹកចិត្តពីសំណាក់មិត្តភក្តិក្នុងនិងក្រៅសិល្បៈជាច្រើន ។
គួរឱ្យដឹងថាតារាសម្តែង វី វុទ្ធី បានចាកចេញពីប្រទេសកម្ពុជាកាលពីថ្ងៃទី ២២ ម្សិលមិញនេះហើយពេលនេះលោកនិងមិត្តភក្តិក៏បានធ្វើដំណើរដល់ប្រទេសហ្វីលីពីនដោយសុវត្ថិភាពដើម្បីរង់ចាំការប្រកួតដណ្តើមពានកីឡាកាយវប្បកម្ម នៅក្នុងថ្ងៃទី ២៥ខាងមុខនេះ ។
ចំពោះការចូលរួមប្រកួតរបស់តារាសម្តែង វី វុទ្ធី នៅក្នុងឆ្នាំ ២០២៤នេះក៏មិនខុសពីឆ្នាំកន្លងទៅដែរលោកទទួលបានការលើកទឹកចិត្តនិងការឧបត្ថម្ភជាទឹកប្រាក់ពីសំណាក់អ្នកគាំទ្រមួយចំនួនដែលកាន់តែធ្វើឱ្យលោករួមនឹងមិត្តភក្តិមានកម្លាំងចិត្តថែមទៀត។ មុននឹងចាកចេញតារាសម្តែងរូបនេះក៏បានប្រឹងប្រែងនៅក្នុងការហ្វឹកហាត់ពង្រឹងសាច់ដុំរបស់ខ្លួនទៅតាមលក្ខខណ្ឌន្តិកៈនៃការប្រកួត។
គូររំឮកដែរថាលោក វី វុទ្ធី គឺជាតារាសម្តែងមួយរូបដែលនិយមសម្តែងជាតួដែលមានចរិកកោងកាច ហើយក៏ជាតួមេទ័ពនៅក្នុងរឿងបែបបុរាណនាពេលកន្លងមក ។ លោក វី វុទ្ធី កាន់តែទទួលបានការគាំទ្រពីសំណាក់មហាជនក្រោយពីលោកបានសម្តែងជាតួ មេទ័ពរបស់ព្រះបាទជ័យវរ្ម័ន នៅក្នុងរឿង «តេជោយ៉ត»។ ក្រៅពីនេះសព្វថ្ងៃលោកក៏ជាគ្រូបង្ហាត់កីឡានៅក្នុងក្លឹបមួយនៅរាជធានីភ្នំពេញ៕
