នេះជាបទដំបូងរបស់តារាចម្រៀងវ័យក្មេង រ៉េត ស៊ូហ្សាណា នៅក្នុងទ្រនំថ្មីក្រោយអាក់ខានចេញបទចម្រៀងប្រមាណជាជិតមួយឆ្នាំ ។ជាមួយនឹងការសរសើរចំពោះស្នាដៃនិពន្ធដំបូងរបស់ រ៉េត ស៊ូហ្សាណា ក៏មានអ្នកគាំទ្រមួយចំនួនបានលើកឡើងថាបទចម្រៀងរបស់នាងស្រដៀងទៅនឹងបទរបស់តារាចម្រៀងអាមេរិកដែលមានចំណងជើងថា «Good 4 u»។
«Lost» ជាចំណងជើងបទចម្រៀងថ្មីរបស់តារាចម្រៀង រ៉េត ស៊ូហ្សាណា នឹងជាស្នាដៃនិពន្ធរបស់នាងផ្ទាល់តែម្តង ដែលបានទម្លាក់ជាផ្លូវការនៅក្នុងផលិតកម្មបារមីកាលពីថ្ងៃទី ២២ យប់មិញនេះ ។ មួយបទរបស់តារាចម្រៀង រ៉េត ស៊ូហ្សាណា ក៏ទទួលបានការពេញចិត្តពីសំណាក់ហ្វេន ហ្វេន ជាច្រើនដោយមានការសរសើរពីសមត្ថភាពនិងទឹកដមសំឡេងក៏ដូចជាការបញ្ចេញក្បាច់រាំរបស់នាងផងដែរ ។
ខ្លះទៀតក៏បានគាំទ្រថាការចូលនៅក្នុងផលិតកម្មបារមីពិតជាស័ក្តិសមសម្រាប់តារាចម្រៀងយុវវ័យ រ៉េត ស៊ូហ្សាណា ។ ទន្ទឹមនឹងការសរសើរក៏មានការវែកញែកថាបទ«Lost»របស់តារាវ័យក្មេង រ៉េត ស៊ូហ្សាណា ហាក់មានភាពស្រដៀងទៅនឹងបទមួយតារាចម្រៀងអាមេរិកដែលមានឈ្មោះថា Olivia Rodrigo ហើយដែលបទនោះមានចំណងជើងថា «Good 4 u» ។
គួរបញ្ជាក់ថា រ៉េត ស៊ូហ្សាណា បានក្លាយជាតារាចម្រៀងនៅក្នុងផលិតកម្ម បារមី កាលពីថ្ងៃទី១៥ ខែសីហា កន្លងទៅ ហើយ បទ «Lost» គឺជាបទចម្រៀងទីដំបូងហើយ៏ជាស្នាដៃនិពន្ធរបស់ កញ្ញាផងដែរ ។ មិនមែនជារឿងធម្មតាទេមុននឹងសម្រេចក្លាយជាតារាចំណូលថ្មីនៅក្នុងផលិតកម្មបារមី រ៉េត ស៊ូហ្សាណា បានអាក់ខានការចេញបទចម្រៀងថ្មីៗប្រមាណជិមួយឆ្នាំដើម្បីពង្រឹងសមត្ថភាពបន្ថែមទៅលើការនិពន្ធបទចម្រៀង ។ បើក្រឡេកមើលផលិតកម្មបារមីក៏បានស្វាគមន៍តារាស្រីចំណូលថ្មីរបស់ខ្លួនយ៉ាងកក់ក្តៅផងដែរ ៕
