ទើបបង្កាត់ភ្លើងស្នេហ៍ជាមួយអ្នកជំនួញអនឡាញ ម៉ាដាម ដា រយៈពេលខ្លីក្តី តែគេសង្កេតឃើញចំណងស្នេហ៍របស់តារាសម្តែង ប៊ឺរី កាន់តែស្អិតរមួតហើយអ្នកទាំងពីរថែមទាំងមានគម្រោងរៀបការជាមួយគ្នានៅដើមឆ្នាំក្រោយថែមទៀតផង ។ អ្វីដែលកត់សម្គាល់ខណៈកំពុងតែមានសេចក្តីសុខ តែតារាសម្តែងប្រុសរូបនេះនៅឆ្លៀតបង្ហោះសារបែបលេងសើចយ៉ាងចាក់ដោតដែលធ្វើឱ្យអ្នកលេងហ្វេសប៊ុកហួសចិត្តគ្រប់គ្នា ។
ក្រៅពីតារាចម្រៀង ថុល សុភិទិ ចុងក្រោយនេះគេសង្កេតឃើញតារាប្រុសរូបសង្ហាមួយចំនួនបានងាកមកភ្ជាប់ស្នេហ៍ជាមួយអ្នកអនឡាញដែលមានភាពជោគជ័យដែលមានដូចជាលោក រស់ រាជ្ជសាល ជាដើម ។ ថ្មីៗនេះទៀតសោតកំលោះសង្ហាវ័យ ៣៧ឆ្នាំ ប៊ឺរី ក៏បានប្រកាសពីទំនាក់ទំនងស្នេហាជាមួយ ម៉ាដាម ដា ក្រោយពីបានរួមការងារជាមួយគ្នា ជាពិសេសក្រោយអ្នកជំនួញរូបនេះចែកផ្លូវជាមួយគូស្នេហ៍ភេទដូចគ្នា ។ មិនរង់ចាំយូរលោក ប៊ឺរី និង ម៉ាដាម បានរៀបចំគម្រោងអនាគតជាមួយគ្នាដែលមានដូចជាការរៀបការនៅខែពីរឆ្នាំក្រោយនឹងមានបំណងយកកូនប្រុសភ្លោះជាដើម ។ អ្វីដែលចាប់អារម្មណ៍ខណៈកំពុងមានក្តីសុខជាមួយ ម៉ាដាម ដា លោក ប៊ឺរី នៅឆ្លៀតបង្ហោះសារដ្រាម៉ាមួយយ៉ាងចាក់ដោតដោយលោកបានបង្ហោះរូបភាពបុរសនារីមួយគូជិះម៉ូតូដែលមានសំណេរថា « អង្គុយក្នុងឡានថ្លៃមិនប្រាកដថាសប្បាយចិត្តជាងជិះម៉ូតូកញ្ចាស់ទេ»។
គេមិនដឹងថាសារបែបដ្រាម៉ាមួយនេះរបស់តារាប្រុសលោក ប៊ឺរី ចង់សំដៅទៅលើនរណាឡើយ ខណៈពេលនេះគេបានដឹងថាលោកក៏កំពុងមានក្តីសុខដែលមានដៃគូមានទាំងកញ្ចប់មិនថាទ្រព្យធន មុខជំនួញនិងភាពឆ្លាតវៃឡើយ។ មិត្តភក្តិរួមការងារជាមួយលោកមិនតិចទេបានចូលរួមត្រេកអរក្រោយពីបានឃើញលោកមានក្តីសុខ និងសុភមង្គលបែបនេះ ។ នៅមិនទាន់មានការបញ្ជាក់ថាក្រោយភ្ជាប់ស្នេហ៍ជាមួយអ្នកជំនួញ ម៉ាដាម ដា លោក ប៊ឺរី នៅតែបន្តទទួលសម្តែងរឿងនៅក្រោមកំដៅថ្ងៃដូចមុនឬបែបណានោះឡើយ៕
