បើទោះជាមានជីវភាពធូរធារនិងមានជំនួញនៅក្នុងដៃមួយចំនួនក៏ពិតមែន តែតារាចម្រៀងជួរមុខ សុគន្ធ និសា នៅតែប្រឹងប្រែងនៅក្នុងការចេញច្រៀងនៅតាមកម្មវិធីនានា។ តួយ៉ាងទើបត្រឡប់មកពីសហរដ្ឋអាមេរិកភ្លាមតារាចម្រៀង សុគន្ធ នីសា ប្រញ៉ាប់រៀបចំខ្លួនដើម្បីចូលរួមច្រៀងនៅក្នុងកម្មវិធីមួយភ្លែតតែម្តង ។
ជឿជាក់ថាអ្នកគាំទ្រប្រាកដជាបានដឹងហើយថាតារាចម្រៀង សុគន្ធ នីសា និងស្វាមីបានចេញទៅលំហែរនៅទឹកដីសហរដ្ឋអាមេរិករយៈពេលមួយខែដែលទើបត្រឡប់មកកាលពីថ្ងៃទី ១១កន្លងទៅ ។ អ្វីដែលកត់សម្គាល់គ្រាន់តែចុះពីយន្តហោះមិនទាន់បានសម្រាកស្រួលបួលផងតារាចម្រៀងរូបស្រស់ម្នាក់នេះប្រញ៉ាប់រៀបចំខ្លួនដើម្បីចូលរួមច្រៀងនៅក្នុងកម្មវិធីឡើងភូមិគ្រឹះមួយដែលមានការចូលរួមពីសំណាក់តារាល្បីៗស្រីបុ្រសជាច្រើនរូប ។
ក្នុងនោះក៏មានការលាន់មាត់សរសើរពីសំណាក់មិត្តភក្តិរួមអាជីពស្ទើរគ្រប់គ្នាថាជិះរថយន្តជាង ២០ម៉ោងពីសហរដ្ឋអាមេរិកមកដល់ស្រុកខ្មែរមិនបានប៉ុន្មានម៉ោងផង សុគន្ធ នីសា បានចេញទទួលការងារថ្មីកើបលុយភ្លែតដោយមិនសម្រាកគេងយកកម្លាំងពិតជាមិនសរសើរមិនបាន ។
ការចាកចេញទៅសាកថ្មជីវិតរបស់តារាចម្រៀង សុគន្ធ នីសា និងស្វាមីនៅទឹកដីអាមេរិកលើកនេះក៏បានធ្វើឱ្យហ្វេន ហ្វេន ជាច្រើនរីករាយហើយរំពឹងថាអ្នកនាងនឹងមានដំណឹងល្អព្រោះដូចដឹងស្រាប់ហើយថារៀបការជាច្រើនឆ្នាំ តែ សុគន្ធ នីសា មិនទាន់មានកូនប្រឡែងលេងបើទោះវ័យរបស់អ្នកនាងក៏ច្រើនគួរសមទៅហើយដែលជាផលវិបាកសម្រាប់ស្ត្រីនៅក្នុងការមានផ្ទៃពោះ ។ ទន្ទឹមជាមួយ នោះក៏មានការបង្ហើបពីសំណាក់មិត្តភក្តិថាបើទោះមិនមានកូនជាចំណងដៃ តែជីវិតប្តីប្រពន្ធរបស់តារាចម្រៀងដែលមានដើមកំណើតនៅខេត្តក្រចេះរូបនេះនៅតែស្អិតរមួតដដែលហើយអ្នកនាង និងស្វាមីបានចិញ្ចឹមសត្វសុនកដ៏គួរឱ្យស្រឡាញ់ដោយហៅថាជាកូនៗយ៉ាងពេញមាត់៕
