ក្រោយតារាចម្រៀងលំដាប់ប្រទេស ឱក សុគន្ធកញ្ញា ទទួលបានជោគជ័យនៅក្នុងការប្រគំតន្រ្តី Solo Concert កាលពីប៉ុន្មានថ្ងៃមុននេះធ្វើឱ្យហ្វេន ហ្វេនរបស់តារាចម្រៀងសំឡេងផ្អែម មាស សុខសោភា ក៏មានបំណងចង់ឱ្យអាយដលរបស់ខ្លួនដើរតាមគន្លង ឱក សុគន្ធកញ្ញា ផងដែរ ។
ក្រោយប្រឡូកក្នុងសិល្បៈជិត ៣០ឆ្នាំ ឱក សុគន្ធកញ្ញា បានសម្រេចបំណងដោយការប្រគំតន្ត្រីទោលដោយទទួលបានការគាំទ្រខ្លាំងពីមហាជនដែលក្នុងរយៈពេលជាងបីម៉ោង អ្នកនាងបានបង្ហើរបទចម្រៀងដល់ទៅ ៣៩បទឯណោះដែលជាលើកដំបូងសម្រាប់តារាចម្រៀងស្រុកខ្មែរដែលធ្វើបានដូចនេះ ។
ដោយឃើញពីភាពជោគជ័យរបស់តារាចម្រៀង ឱក សុគន្ធកញ្ញា ទើបហ្វេន ហ្វេនរបស់តារាចម្រៀង មាស សុខសោភា ចង់ឱ្យនាង ធ្វើ Solo Concert ព្រោះដូចដឹងស្រាប់ហើយថាអ្នកនាងក៏ជាតារាចម្រៀងដែលមានឈ្មោះបោះសំឡេងលំដាប់ប្រទេសម្នាក់ដែរហើយ បទចម្រៀងរបស់នាងកន្លងមកសុទ្ធតែជាបទដែលពិរោះៗនិងទទួលបានការគាំទ្រខ្លាំងពីសំណាក់មហាជនគ្រប់ស្រទាប់វ័យ ។ ទាំងតារាចម្រៀង មាស សុខសោភា និង ឱក សុគន្ធកញ្ញា សុទ្ធតែជាតារាចម្រៀងដែលមានកេរ្តិ៍ឈ្មោះល្បីប្រហាក់ប្រហែលគ្នាមិនអាចបែងចែកនរណាលើនរណាឡើយ ។ ប៉ុន្តែយ៉ាងណាចុងក្រោយនេះ មាស សុខសោភា ហាក់មិនសូវរវីរវល់នៅក្នុងការចេញបទចម្រៀងថ្មីៗនោះឡើយពោលនាងបានងាកទៅពង្រឹងអាជីពលក់ផលិតផលរក្សាសម្រស់វិញម្តង ។
អ្វីដែលចាប់អារម្មណ៍បន្ទាប់ពីចាកចេញពីផលិតកម្មរាម រហូតមកដល់ពេលនេះ មាស សុខសោភា នៅតែមិនទាន់ចូលជ្រកក្នុងផលិតកម្មណាជាក់លាក់ឡើយ តែនាងតែងចេញបទចម្រៀងថ្មីនៅក្នុងផលិតកម្មផ្ទាល់ខ្លួន Camtrax Music ជូនដល់អ្នកគាំទ្រ។បើទោះមានអ្នក ហ្វេន ហ្វេន ជាច្រើនមានបំណងចង់ឱ្យ មាស សុខសោភា ធ្វើកម្មវិធី Solo Concert ក្តី តែគេមិនទាន់ឃើញអ្នកនាងឆ្លើយតបនៅឡើយទេ ខណៈមហាជនជាច្រើននៅតែរំពឹងថាអាយដលខ្លួននឹងដើរតាមគន្លង ឱក សុគន្ធកញ្ញា នៅក្នុងពេលណាមួយជាក់ជាមិនខាន៕
