មានការភ្ញាក់ផ្អើលពីសំណាក់អ្នកគាំទ្រជាច្រើនបើទោះមិនមានទ្រនំជាក់លាក់ តែតារាចម្រៀងសំឡេងផ្អែម មាស សុខសោភា នៅតែជាតារាដែលមានគុណភាពនឹងភាពល្បីល្បាញមិនថាក្នុងស្រុកឬក្រៅស្រុក ។ តួយ៉ាងថ្មីៗនេះ មាស សុខសោភា បានបង្ហាញវត្តមាននៅក្នុងស្ទូឌីយោថតសំឡេងនៅសហរដ្ឋអាមេរិកដើម្បីថតចម្រៀងដាក់បញ្ចូលក្នុងភាពយន្តដែលត្រៀមដាក់បញ្ចាំងក្នុងកម្មវិធីដ៏ល្បី Netflix ថែមទៀត។
កាលពីថ្ងៃទី ២១ ម្សិលមិញនេះតារាចម្រៀង មាស សុខសោភា បានចែករំលែករូបភាពជាច្រើនសន្លឹកដែលអ្នកនាង និងគូស្នេហ៍បានបង្ហាញវត្តមាននៅក្នុងស្ទីឌីយោនៅសហរដ្ធអាមេរិចដែលមានឈ្មោះថា Disher Sound ដែលស្ថិតនៅក្នុងទីក្រុង San Francisco រដ្ឋ California សហរដ្ឋអាមេរិក។
ក្នុងនោះម្ចាស់បទ «ដើមឈើស្នេហ៍»រូបនេះបានបង្ហោះសាររៀបរាប់ថា «បទពិសោធន៏នៃការថតបទចំរៀងថ្មីរបស់នាងខ្ញុំនៅក្នុងស្ទីឌីយោនៅសហរដ្ឋអាមេរិចដែលត្រៀមដាក់បញ្ចូលក្នុងសាច់រឿងភាពយន្តខ្នាតធំឆាប់ៗនេះThank you Mr.Tom,Daron and Rada»។ ជុំវិញការលើកឡើងពីសមិទ្ធផលថ្មីរបស់ មាស សុខសោភា នៅស្ទីឌីយោសហរដ្ឋអាមេរិក បានធ្វើឱ្យអ្នកគាំទ្ររបស់អ្នកនាងមានការរំភើបជាខ្លាំងហើយម្នាក់ៗរង់ចាំទស្សនាបទថ្មីរបស់អ្នកនាងដែលនឹងត្រៀមដាក់បញ្ចូលនៅក្នុងខ្សែភាពយន្តខ្នាតធំដែលនឹងចាក់នៅក្នុងកម្មវិធីល្បី Netflix ហើយក៏មានអ្នកខ្លះចង់ដឹងពីចំណងជើងភាពយន្តនេះផងដែរ ។
បើតាមដឹងការចេញទៅថតបទចម្រៀងនៅស្ទីឌីយោនាទឹកដីសហរដ្ឋអាមេរិកនេះគឺអំឡុងពេល មាស សុខសោភា បានចូលរួមនៅក្នុងកម្មវិធីប្រគំតន្រ្តីមួយនៅទីក្រុង San Francisco កាលពីពេលកន្លងទៅជាមួយតារាចម្រៀង ខេមរៈ សិរីមន្ត បាន មុន្នីលក្ខណ៍ និងលោក វណ្ណថាន ជាដើម ។ចុងក្រោយនេះក្រៅពីចេញបទចម្រៀងថ្មីៗ មាស សុខសោភា ក៏បានដឹកដៃគូស្នេហ៍លោក អ៊ិត ដារ៉ា កើបប្រាក់រួមគ្នាតាមរយៈការផ្សព្វផ្សាយផលិតផលនានា៕
