មានការចាប់អារម្មណ៍និងលាន់មាត់សរសើរពីសំណាក់អ្នកគាំទ្រគ្រប់គ្នាក្រោយបានឃើញតារាចម្រៀងជើងចាស់លោក ណូយ វ៉ាន់ណេតបានបង្ហាញសមត្ថភាពតាមរយៈការលេងកំប្លែងជាមួយក្រុម នាយព្រែក ។ ក្រៅពីបង្ហាញការពេញចិត្តអ្នកគាំទ្រជាច្រើនលាន់មាត់សរសើរដល់តារាចម្រៀងជើងចាស់រូបនេះដែលមានសមត្ថភាពលេងបានគ្រប់ទម្រង់សិល្បៈពិតជាមិនធម្មតាមែន ។
បើទោះជាមានវ័យជ្រេបន្តិចក្តី តែលោក ណូយ វ៉ាន់ណេត នៅតែបន្តអាជីពចម្រៀងដដែល គ្រាន់តែប្រជាប្រិយភាពរបស់លោកពុំសូវហក់ខ្លាំងដូចនាពេលកន្លងមក ។ ប៉ុន្តែបើនិយាយពីទឹកដមសំឡេងរបស់តារាចម្រៀងជើងចាស់រូបនេះនៅតែផ្អែមពិរោះមិនថមថយពីមុនទេ ។ ជារឿយៗលោក ណូយ វ៉ាន់ណេត តែងលេចមុខនៅតាមឆាកតន្រ្តីនៃបណ្តារស្ថានីយទូរទស្សន៍ រួមនឹងការច្រៀងនៅតាមកម្មវិធីមង្គលការផងដែរ ។
ប៉ុន្តែថ្មីៗនេះលោក ណូយ វ៉ាន់ណេត បានធ្វើឱ្យអ្នកគាំទ្រស្ទើរបាក់ចង្កេះគ្រប់គ្នាក្រោយលោកបានបង្ហាញមុខនៅក្នុងការលេងកំប្លែងជាមួយក្រុម នាយព្រែក នៅក្នុងការប្រម៉ូដផលិតផលនានាជាលើកដំបូង។ អ្វីដែលកត់សម្គាល់ការសម្តែងកំប្លែងរបស់តារាចម្រៀងជើងចាស់រូបនេះក៏បានធ្វើឱ្យអ្នកលេងហ្វេសប៊ុកជាច្រើនពេញចិត្តគ្រប់គ្នា ។ ជាក់ស្តែងមិនដល់២៤ម៉ោងផងមានអ្នកចុចចូលទស្សនារហូតដល់ទៅជាង១លានដងឯណោះ ។
ក្នុងនោះក៏មានការសរសើរដល់តារាចម្រៀង ជើងចាស់ ណូយ វ៉ាន់ណេត ដែលមានសមត្ថភាពមិនធម្មតាអាចលេងកំប្លែងបានយ៉ាងស័ក្តិសមហើយល្អថែមទៀត។ ខ្លះទៀតក៏បានសរ សើរដល់ នាយព្រែក ដែលមានគំនិតយកតារាជើងចាស់មកបញ្ចេញសមត្ថភាពបែបនេះព្រោះដឹងស្រាប់ហើយថាតារាជំនាន់មុនពួកគាត់ជាសិល្បករ សិល្បការិនីដែលមានសមត្ថភាពនិងទេពកោសល្យពិតប្រាកដ។ ខ្លះទៀតក៏បានសំណូមពរឱ្យលោក ណូយ វ៉ាន់ណេត និងលោក ទេព រិនដារ៉ូ បានសម្តែងរួមគ្នានៅក្នុងរឿងកំប្លែងខ្លីៗបែបនេះ ។ បើតាមការលើកឡើងរបស់ នាយព្រែក បានឱ្យដឹងថាមិនមែនមានតែមួយរឿងនេះទេលោក ណូយ វ៉ាន់ណេត បានថតរឿងឱ្យនាយបានពីរ ទៅបីរឿងដែរ តែយ៉ាងណា នាយមិនបានបញ្ជាក់ពីមូលហេតុដែលជ្រើសរើសតារាចម្រៀងជើងចាស់រូបនេះមកសម្តែងកំប្លែងឡើយ ៕
