មានការចាប់អារម្មណ៍និងបង្ហាញនូវក្តីអាណិតអាសូរពីសំណាក់មហាជនជាច្រើនដែលធ្លាប់គាំទ្រអតីតតារាចម្រៀងល្បី អ៊ុំ គន្ធា ក្រោយពីបានឃើញលោក អ៊ឹម ជីវ៉ា បានចែករំលែកនូវរូបភាពរបស់នាងនាពេលនេះដែលកំពុងធ្លាក់ខ្លួនឈឺធ្ងន់ ។
ជឿជាក់ថាអ្នកគាំទ្រប្រាកដជាបានដឹងហើយថាអតីតតារាចម្រៀងសិចស៊ីល្បីរូបនេះមានជំងឺសង្គមដ៏កាចសាហាវជាប់ខ្លួនប្រមាណជាជិត២០ឆ្នាំ ហើយក៏ជាហេតុផលដែលធ្វើឱ្យនាងបាត់បង់សម្រស់និងបញ្ចប់អាជីពជាអ្នកសិល្បៈ ។
កន្លងមក អ៊ុំ គន្ធា ក៏ទទួលបានការជួយជ្រោមជ្រែងផ្តល់ជាថ្នាំនិងការពិនិត្យសុខភាពជារៀងរាល់ខែពីសំណាក់អង្គការក្នុងស្រុកផងដែរ។កន្លងមកអតីតតារាចម្រៀងសិចស៊ីរូបនេះក៏ត្រូវបានក្រសួងមួយបានផ្តល់ជាការងារដល់អ្នកនាង តែមួយរយៈមុន អ៊ុំ គន្ធា ធ្លាប់បានត្អូ្ញញត្អែរតាមបណ្តាញសង្គមថាមិនមានប្រាក់ក្រោយ ក្រសួងបញ្ឈប់ការងារ។ អ្វីដែលគួរឱ្យចាប់អារម្មណ៍នៅក្នុងថ្ងៃទី ១៦ នេះអ្នកលេងហ្វេសប៊ុកមានការភ្ញាក់ផ្អើលនិងស្រណោះជាខ្លាំងក្រោយបានឃើញ អ៊ុំ គន្ធា មានការធ្លាក់សម្រស់និងប្រែប្រួលប្លែកស្ទើរចំណាំមុខមិនបានពោលពេលនេះនាងកំពុងមានជំងឺធ្ងន់ធ្ងរ។
បើតាមការរៀបរាប់របស់លោក អ៊ឹម ជីវ៉ា នៅក្នុងថ្ងៃនេះបានបង្ហោះរូបភាពរបស់ អ៊ុំ គន្ធា បានឱ្យដឹងថា «ជីវិតគឹបែបនេះ អាណិតណាស់ អតីតតារាចំរៀងដ៏ល្បី គឺអ្នកនាង អ៊ុំគន្ធា កំពុងធ្លាក់ខ្លួនឈឺធ្ងន់ នេះបើតាមការផ្តល់ពត៌មានពីក្រុមគ្រួសាររបស់គាត់មកប្រាប់ខ្ញុំបាទ អ៊ឹម ជីវ៉ា ! កន្លងមកខ្ញុំបាទធ្លាប់ជួយគាត់ច្រើនណាស់ ជាហូរហែមិនដាចឡើយ តែមួយរយៈនេះស្រាប់តែបាត់ការទាក់ ទងឈឹង ហើយថ្ងៃនេះក៏មានក្រុមគ្រួសារប្រាប់តែម្តងថាគាត់ឈឺធ្ងន់ »។
តាមរយៈរូបភាព អ៊ុំ គន្ធា នាពេលបច្ចុប្បន្ននេះបានធ្វើឱ្យមហាជនដែលធ្លាប់ស្គាល់នាងមានការអាណិតអាសូរជាខ្លាំងព្រោះមិននឹកស្មានថាតារាចម្រៀងដែលធ្លាប់មានឈ្មោះល្បីរូបនេះប្រែជាធ្លាក់ដល់ដំណាក់កាលបែបនេះសោះ។គួរឱ្យដឹងថា អ៊ុំ គន្ធា ធ្លាប់ជាតារាចម្រៀងកន្ត្រាក់អារម្មណ៍និងហាយសូមួយរូបដែលមានឈ្មោះល្បីល្បាញកាលពីជិត ២០ឆ្នាំមុន តែគួរឱ្យស្តាយនាងបានបោះបង់អាជីពនេះចោលក្រោយពីបានធ្លាក់ខ្លួនមានជំងឺសង្គមកាចសាហាវជាប់ខ្លួន៕
