ភ្នំពេញ៖ កាលពីវេលាម៉ោង១១និង២៥នាទីព្រឹក ថ្ងៃទី២៧ធ្នូ២០១៦ម្សិលមិញនេះ ស្ថិតនៅជាន់ទី៤នៃផ្ទះលេខ៤៧A ផ្លូវសុធារស ស្ថិតក្នុងភូមិ៨ សង្កាត់ទន្លេបាសាក់ ខណ្ឌចំការមន ភ្នំពេញ។ ដោយមាននារីម្នាក់ប៉ុនប៉ងលោតចុះពីលើជាន់ទី៤ បម្រុងសម្លាប់ខ្លួន តែសំណាងល្អសង្សារនាងលួងលោមនាងបានមកវិញ។
នារីវ័យក្មេងខាងលើត្រូវបានគេស្គាល់ថា មានឈ្មោះ នាង លីតា អាយុ២១ឆ្នាំ មុខរបរបម្រើការនៅក្នុងភោជនីយដ្ឋាន ចំណែកបុរសជាសង្សារឈ្មោះ សាន វីរ័ត្ន អាយុ២២ឆ្នាំ ជាបុគ្គលិករបស់ក្រុមហ៊ុនមួយ ពួកគេស្នាក់នៅក្នុងបន្ទប់ជួលជាន់ទី៤ នេះផ្ទះកើតហេតុ ។
យោងតាមប្រភពពីកន្លែងកើតហេតុឲ្យដឹងថា មុនពេលកើតហេតុ គេបានឃើញនារីវ័យក្មេងខាងលើឡើងឈរលើបង្កាន់ដៃខាងមុខបន្ទប់ស្នាក់នៅរបស់ខ្លួន ដោយការយំស្រែកយ៉ាងខ្លាំងឈ្លោះប្រកែកគ្នាជាមួយបុរសជាសង្សាដែលនៅក្នុងបន្ទប់ធ្វើឲ្យមានការភ្ញាក់ផ្អើលយ៉ាងខ្លាំងដល់អ្នកជិតខាង និងអ្នកដំណើរតាមផ្លូវឈប់ចោមរោមមើល។ ស្រាប់តែនារីវ័យក្មេងរូបនោះឡើងលើបង្កាន់ដៃមុខបន្ទប់ស្នាក់នៅរបស់ខ្លួនក្នុងបំណងលោតធ្វើអត្តឃាត តែត្រូវបុរសជាសង្សារនិយាយលួងលោមនាងយ៉ាងយូរ ទើបនាងព្រមឡើងចូលទៅក្នុងបន្ទប់វិញ ។
គួរបញ្ជាក់ថា មូលហេតុដែលនារីវ័យក្មេងរូបនោះឈ្លោះជាមួយសង្សារដោយសារតែនាងប្រច័ណ្ឌសង្សារថាបានលួចមានស្រីថ្មី ទើបធ្វើឲ្យឈឺចិត្តរហូតដល់ថ្នាក់ចង់លោតពីលើជាន់ទី៤សម្លាប់ខ្លួន តែសំណាងណាស់បុរសជាសង្សារលួងលោមនាងរហូតនាងលែងលោតវិញ កុំអីមិនដឹងជាយ៉ាងណាទេ៕
ផ្តល់សិទ្ធិដោយ៖VD7News.com
