ខេត្តកណ្ដាល៖ កាលពីរសៀលថ្ងៃទី២៩ ធ្នូ ឆ្នាំ២០១៦ ម្សិលមិញនេះ មានបុរសម្នាក់ត្រូវបាននគរបាលចាប់ខ្លួន ក្រោយធ្វើសកម្មភាពវាយដំប្រពន្ធឲ្យរងរបួសធ្ងន់ នៅក្នុងភូមិវិហាសួគ៌ជើង ឃុំវិហារសួគ៌ ស្រុកខ្សាច់កណ្តាល។
យោងតាមលោកវរសេនីយ៍ទោ ម៉ែន សុខឃឿន អធិការស្រុក បានឲ្យដឹងថា ជនបង្កមានឈ្មោះ សុខ ភឹម អាយុ៣៩ឆ្នាំ ចំណែកជនរងគ្រោះជាប្រពន្ឋមានឈ្មោះ ឃឹម គង់ អាយុ៤៣ឆ្នាំ។ប្រភពពីការរៀបរាប់របស់ស្ត្រីជាប្រពន្ធឲ្យដឹងថា ប្តីរបស់គាត់រាល់ពេលស្រវឹងស្រាតែងរករឿងវាយដំគាត់មិនដែលខានទេ រហូតពេលកើតហេតុដោយទ្រាំនឹងភាពឈឺចាប់មិនបានក៏រត់ទៅប្រាប់អ្នកភូមិសង្គ្រោះ រួចរាយការណ៍ទៅសមត្ថកិច្ចតែម្តង។
ក្រោយទទួលបានព័ត៌មានកម្លាំងនគរបាលបានចុះអន្តរាគមន៍ចាប់ខ្លួនជនបង្កនាំទៅកាន់អធិការដ្ឋានស្រុក ចាត់ការទៅតាមផ្លូវច្បាប់៕
ផ្តល់សិទ្ធិដោយ៖VD7News.com
