ភ្នំពេញ៖ កាលពីវេលាម៉ោង៩និង១៩នាទីយប់ថ្ងៃទី២៧ធ្នូ ២០១៦នេះ ស្ថិតនៅតាមបណ្តោយផ្លូវ៤៣២ កែងផ្លូវ១៥៥ ក្នុងសង្កាត់ទួលទំពូងទី១ខណ្ឌចំការមន។ ដោយមានជនសង្ស័យ៣នាក់ធ្វើសកម្មភាពឆក់កាបូបពីនារីម្នាក់បានសម្រេចហើយនោះជាអកុសលត្រូវបានអ្នកដំណើរ២នាក់ប្ដីប្រពន្ធបើករថយន្តបំបុកដួលរួចចាប់ប្រគល់ឲ្យសមត្ថកិច្ច។
យោងតាមសាក្សីដែលឃើញហេតុការណ៍បានឲ្យដឹងថាមុនពេលកើតហេតុជនសង្ស័យ៣នាក់ជិះម៉ូតូម៉ាកនិច១គ្រឿង ពណ៌ខ្មៅបានធ្វើសកម្មភាពឆក់កាបូបពីនារីម្នាក់បណ្តាលឲ្យជនរងគ្រោះដួលរួចជនសង្ស័យបានបន្ថែមល្បឿនគេចខ្លួនតែត្រូវបានអ្នកដំណើរ២នាក់ប្ដីប្រពន្ធឃើញទាន់បានបើករថយន្តដេញតាមរហូតមកដល់ផ្លូវ៤៣២កែង១៥៥ ក៏បុកបណ្តាលឲ្យជនសង្ស័យទាំង៣នាក់ដួលរងរបួសធ្ងន់ម្នាក់និង២នាក់ទៀតស្រាល។
សាក្សីខាងលើបន្តទៀតថា ក្រោយពីជនសង្ស័យដួលរួចក៏ស្រែកចោរៗ ដើម្បីឲ្យប្រជាពលរដ្ឋនៅទីនោះជួយចាប់យកទៅឲ្យសមត្ថកិច្ចតែម្តង។ ក្រោយពេលកើតហេតុជនសង្ស័យទាំង៣នាក់ត្រូវបានសមត្ថកិច្ចយកទៅសួរនាំនៅប៉ុស្តិ៍៕
ទស្សនាវីដេអូ
