បន្ទាយមានជ័យ៖ ពលរដ្ឋខ្ទង់ពាន់នាក់ នៅព្រឹកថ្ងៃទី ២៩ខែធ្នូ ឆ្នាំ២០១៦នេះ បានផ្ទុះការតវ៉ា និងឈានដល់ការនាំគ្នាបិតផ្លូវជាតិលេខ៥ នៅចំណុចក្បាលស្ពាន ក្រុងប៉ោយប៉ែតផងដែរ ដើម្បីសុំឲ្យដោះលែងលោក ឌិន ពុទ្ឋី ប្រធានសមាគមសេដ្ឋកិច្ចក្រៅប្រព័ន្ធកម្ពុជា ដែលត្រូវសមត្ថកិច្ចឃាត់ខ្លួននិងត្រូវតុលាការសម្រេចឃុំខ្លួនដាក់ពន្ធនាគារ ក្រោមបទចោទ បើកបុកនាយរងប៉ុស្តិ៍ច្រកទ្វារអន្តរជាតិប៉ោយប៉ែត។
ក្នុងការតវ៉ារបស់ពលរដ្ឋនេះ សមត្ថកិច្ចចម្រុះរាប់សិបនាក់ក៏បានធ្វើការបំបែកអ្នកការតវ៉ា ដែលបង្កឲ្យកើតហិង្សាបន្តិចតួច រួចឈានដល់មានការឃាត់ខ្លួនស្ត្រី២នាក់ផងដែរ ប៉ុន្តែក្រោយមកសមត្ថកិច្ចបានធ្វើការដោះលែង និងឈប់ធ្វើការតវ៉ាវិញ បន្ទាប់ពីមានការចរចាគ្នារវាងគ្រួសារលោក ពុទ្ធី និងលោកឧត្តមសេនីយ៍ទោ អាត់ ខែម ស្នងការខេត្តបន្ទាយមានជ័យ និងព្រះរាជអាជ្ញាអមសាលាដំបូងខេត្តបន្ទាយមានជ័យ លោក មាស ចន្ទពិសិដ្ឋនិង លោក អភិបាលក្រុងប៉ោយប៉ែត។
គួររំលឹកដែរថា មុននឹងឈានដល់ការតវ៉ានេះ នៅពេលថ្មីៗនេះ មានករណីគ្រោះថ្នាក់ចរាចរណ៍មួយរវាងលោក ឌិន ពុទ្ធី និងលោក ឈាន ពិសិដ្ឋ ជានាយរងប៉ុស្តិ៍ច្រកទ្វារអន្តរជាតិប៉ោយប៉ែត រួចបណ្ដាលឲ្យមានការឃុំខ្លួនលោក ឌិន ពុទ្ធី ដែលករណីគ្រោះថ្នាក់ចរាចរណ៍នេះ បានធ្វើឲ្យសាធារណជនពិសេសអ្នកលេងក្នុងបណ្ដាញសង្គមរិះគន់មិនសំចៃមាត់ថា មានចំណុចសង្ស័យជាច្រើនចំពោះនាយរងរូបនោះ ហើយករណីនេះទៀតសោត ក៏បានក្លាយបញ្ហារសើបមួយ ដែលធ្វើឲ្យសម្តេច ក្រឡាហោម ស ខេង បានបញ្ជាផ្ទាល់ ឲ្យមានការបើកការស៊ើបអង្កេតផងដែរ៕
ផ្តល់សិទ្ធិដោយKQUBE
