ភ្នំពេញ៖ កាលពីវេលាម៉ោង១០និង១០នាទីយប់ថ្ងៃទី២៨ធ្នូ ២០១៦ នៅចំណុចបណ្ដោយផ្លូវរទេះភ្លើង ស្ថិតក្នុងក្រុមទី១០៩ ភូមិ២៣ សង្កាត់បឹងកក់២ ខណ្ឌទួលគោក ម្ដុំរោងចក្រឆ្នាំង។ ប្រភពពីសមត្ថកិច្ចបានឲ្យដឹងថា នៅមុនពេលកើតហេតុ កម្លាំងអន្តរាគមន៍ចម្រុះក្រុង សហការជាមួយសមត្ថកិច្ចមូលដ្ឋាន បានចុះល្បាតក្នុងភូមិសាស្ត្រខាងលើ ក៏បានជួបនឹងក្មេងប្រុស៣នាក់ ដែលកំពុងធ្វើសកម្មភាពចែកចាយគ្រឿងញៀន ក៏ធ្វើការឃាត់ខ្លួនតែម្ដង ដោយដកហូតបានថ្នាំញៀន៥៤កញ្ចប់តូច និង១កញ្ចប់ធំ ទូរស័ព្ទដៃ១គ្រឿង រួមជាមួយប្រាក់៤០ម៉ឺនរៀល។
ប្រភពឲ្យដឹងថា ជនសង្ស័យទាំង៣នាក់ ទី១.ឈ្មោះ លី ចក្រី ភេទប្រុស អាយុ១៦ឆ្នាំ ជាអ្នកដើរលក់សៀវភៅ ស្នាក់នៅម្ដុំវត្តញាណរង្សី សង្កាត់បឹងកក់១ ខណ្ឌទួលគោក ទី២.ឈ្មោះ ឯម ដានីត ភេទប្រុស អាយុ១៤ឆ្នាំ ជាអ្នកដើរលក់សៀវភៅ និងវ៉ៃសារ៉ាស្បែកជើង ស្នាក់នៅម្ដុំវត្តញាណរង្សី ផ្ទះលេខ៣២៦ ផ្លូវ៣៣៦ ក្រុម២ សង្កាត់បឹងកក់១ ខណ្ឌទួលគោក និងទី៣.ឈ្មោះ សែម សេរី ហៅទី អាយុ១៣ឆ្នាំ ភេទប្រុស ជាអ្នកលក់សៀវភៅ ស្នាក់ម្ដុំផ្សារដើមគ សង្កាត់ផ្សារដើមគ ខណ្ឌទួលគោក។
បន្ទាប់ពីសាកសួររួច សមត្ថកិច្ចបានបញ្ជុនជនសង្ស័យទាំង៣នាក់ ទៅកាន់អធិការដ្ឋាន នគរបាលខណ្ឌ ទួលគោក ដើម្បីកសាងសំណុំរឿងចាត់ការទៅតាមផ្លូវច្បាប់៕
ផ្តល់សិទ្ធិដោយ៖VD7News.com
