សិល្បៈ ៖ កាលពីរសៀលទីថ្ងៃ២៥ ធ្នូ ល្ងាចមិញនេះ តារាចម្រៀងកញ្ញា សុខ ពិសី ត្រូវបានអ្នកគាំទ្រយកកាដូដ៏ធំមួយមកជូនដល់ហាងធ្វើឲ្យនាងសប្បាយចិត្ត និងភ្ញាក់ផ្អើលជាខ្លាំង នៅពេលបើកកាដូឃើញកូនឆ្កែដ៏គួរឲ្យស្រឡាញ់។
សុខ ពិសី ប្រាប់ Kqube.net នៅមុននេះបន្តិចថា ក្នុងថ្ងៃបុណ្យ ណូអែល នេះនាងទទួលបានកាដូច្រើនពីអ្នកគាំទ្រ ប៉ុន្តែកាដូដែលធ្វើឲ្យនាងភ្ញាក់ផ្អើលជាងគេ គឺកាដូកូនឆ្កែពណ៌សដ៏គួរឲ្យស្រឡាញ់មួយនេះ។ កញ្ញាបន្តថា កាលពីរសៀលម៉ោងប្រមាណជា៤កន្លះល្ងាចមិញនេះ ពេលដែលនាងកំពុងនៅមើលហាង ស្រាប់តែមានអ្នកគាំទ្របានយកកាដូធំមួយមកជូនដល់ក្នុងហាង ប៉ុន្តែមុនពេលប្រគល់កាដូគាត់បានឲ្យនាងបិទភ្នែក និងលូកដៃស្ទាបរបស់នៅក្នុងកាដូ ពេលនោះធ្វើឲ្យនាងភ្ញាក់ផ្អើលផង ខ្លាចផង ព្រោះដឹងថាជាសត្វ។
សុខ ពិសី បន្តថា ពេលនាងបើកភ្នែកស្រាប់ឃើញកូនឆ្កែ ដ៏គួរឲ្យស្រឡាញ់មួយនេះ ហើយនាងពិតជាពេញចិត្តខ្លាំងណាស់ ព្រោះវាស្អាតគួរឲ្យស្រឡាញ់ ហើយពេលនោះអ្នកគាំទ្រ ក៏បានប្រាប់មកនាងថា ឲ្យជួយដាក់ឈ្មោះវាផង ហើយនាងក៏បានដាក់ឈ្មោះកូនឆ្កែនេះថា ប៉ោម ព្រោះនាងយល់ថា ឈ្មោះនេះពីរោះ។ សុខ ពិសី ក៏បានប្រាប់ជាចុងក្រោយនាងពិតជាអរគុណដល់អ្នកគាំទ្រខ្លាំងណាស់ ដែលបានជូនកាដូនេះក្នុងថ្ងៃបុណ្យ ណូអែល គឺពិតជាធ្វើសប្បាយរីករាយ និងពេញចិត្តកូនឆ្កែនេះជាខ្លាំង៕
ផ្តល់សិទ្ធិដោយ៖KQUBE
