បើយោងតាមការបញ្ជាក់ពី មន្រ្តីជាន់ខ្ពស់រាជរដ្ឋាភិបាលកម្ពុជាបានឲ្យដឹងថា ប្រធានាធិបតីទី១៦ របស់សាធារណរដ្ឋហ្វីលីពីន លោក រ៉ូឌ្រីហ្គោ ឌូតឺតេ ដែលអមដំណើរដោយកំពូលអ្នកប្រដាល់ពិភពដ៏ល្បាញល្បីនិងជាសមាជិកព្រឹទ្ធសភា កីឡាករ ម៉ែននី ប៉ាគីវអាវ នោះ នឹងអញ្ជើញមកដល់ប្រទេសកម្ពុជា នាវេលាម៉ោងប្រមាណ ៥៖៥០នាទីល្ងាច ថ្ងៃទី១៣ ខែធ្នូ ឆ្នាំ២០១៦ ស្អែកនេះ ។
ប្រភពព័ត៌មានដដែលបានឲ្យដឹងទៀតថា ក្នុងដំណើរទស្សនកិច្ចផ្លូវរដ្ឋនេះលោកប្រធានាធិបតី ឌូតឺតេ នឹងសម្រាកមួយយប់នៅសណ្ឋាគារសូហ្វីតែល ភូគីត្រា រាជធានីភ្នំពេញ ហើយអំឡុងពេលស្នាក់នៅនោះដែរ លោកក៏មានការជួបសំណេះសំណាលជាមួយពលរដ្ឋហ្វីលីពីន ដែលកំពុងរស់នៅកម្ពុជាផងដែរ។
សូមបញ្ជាក់ថា៖ ដំណើរទស្សនកិច្ចនេះ លោក ឌូតឺតេ នឹងចូលបង្គំគាល់ ព្រះបាទព្រះបរមនាថ នរោត្តម សីហមុនី ព្រះបរមរាជវាំង និងជួបពិភាក្សាទ្វេភាគីជាមួយ សម្ដេចតេជោ ហ៊ុន សែន ព្រមទាំងធ្វើជាសាក្សីក្នុងការចុះហត្ថលេខាលើ ឯកសារចំនួនពីរដែលទី១ អនុសារណៈ ស្ដីពី កិច្ចសហប្រតិបត្តិការក្នុងការប្រឆាំងឧក្រិដ្ឋកម្មឆ្លងដែន និងទី២ អនុសារណៈនៃកិច្ចព្រមព្រៀងស្ដីពីសហប្រតិបត្តិការលើវិស័យកីឡា៕
ផ្ដល់សិទ្ធិដោយ៖KQUBE
