សិល្បៈ ៖ ជាការជួបគ្នាដ៏កម្រសម្រាប់ព្រឹទ្ធាចារ្យ ចាប៉ីដងវែង វ័យចំណាស់ទាំង៥រូបបានស្កាត់ជួប ដើម្បីសួរសុខទុក្ខគ្នា ព្រោះពួកគាត់មិនត្រឹមតែអាយុច្រើន ភាពជរាពាធចូលលុកលុយប៉ុណ្ណោះទេ ថែមទាំងរស់នៅខេត្តផ្សេងៗគ្នាថែមទៀត ដូច្នេះហើយនៅពេលតារាចម្រៀងចិត្តធម៌លោក សន វិជ្ជបុត្រ បានរៀបចំឲ្យព្រឹទ្ធាចារ្យបានជួបគ្នា ពិតជាសង្វេគណាស់នៅពេលបានឃើញអ្នកថែមរក្សាសម្បត្តិបេតិកភណ្ឌអរូបិយមនុស្សជាតិ ពិការភ្នែក ពិការជើង និងមានជីវភាពទីទាល់ក្រ។
លោកព្រឹទ្ធាចារ្យ វ័យ៨១ឆ្នាំ ប្រាជ្ញ ឈួន បានប្រាប់អ្នកយកព័ត៌មាន Kqube.net ក្នុងភាពនិយាយលែងច្បាស់ និងមានរាងកាយទ្រុឌទ្រោមថា លោកពិតជាមានចិត្តសប្បាយរីករាយណាស់ ការដែលកូនចៅបានរៀបចំឲ្យប្អូនៗអ្នកចម្រៀង ចាប៉ី ទាំងបួនរូបមកសួរសុខទុក្ខដល់គេហដ្ឋានរបស់គាត់ផ្ទាល់ ព្រោះការជួបគ្នាបែបនេះមិនដែលមានទេ ដោយសារប្អូនៗនៅខេត្តឆ្ងាយៗពីគ្នា ហើយការជួបគ្នានេះគឺពិតជាមានន័យណាស់សម្រាប់ជីវិតលោក ព្រោះពេលនេះលោកក៏មានអាយុច្រើនភាពជរាពាធក៏ចូលលុកលុយកាន់តែខ្លាំង។
លោកតាកោសល្យវោហារ គង់ ណៃ លោកតា អ៊ិន សារុន លោកតា សួន សាន និង អ្នកចាប៉ីសម្បូរវោហារលោកតា នេត្យ ប៉េ បានលើកឡើងស្រដៀងគ្នាថា លោកពិតជារំភើប និងរំជួលចិត្តជាខ្លាំង ការដែលចៅប្រុស សន វិជ្ជបុត្រ និងអ្នកសិល្បៈមួយចំនួនទៀត បានរៀបចំនាំអ្នកចម្រៀងចាប៉ីទាំងប្រាំរូបដែលមានសុខភាពអាចធ្វើដំណើរបានមកជួបសួរសុខទុក្ខលោកបង និងលោកឪពុក ប្រាជ្ញ ឈួន ដែលគាត់ខ្សោយជាងគេ ព្រោះលោកខានបានជួបគ្នាច្រើនឆ្នាំមកហើយ ពេលនេះទោះជាអ្នកខ្លះពិការភ្នែក មើលមិនឃើញ និងអ្នកខ្លះទៀតពិការជើងដើរមិនបាន តែការជួបគ្នានេះអាចស្ទាបដឹងពីភាពជរាទៅវិញទៅមកក្នុងនាមជាអ្នកសិល្បៈចាប៉ីដងវែងដូចគ្នា ។
លោក សន វិជ្ជបុត្រ ផ្ដល់បទសម្ភាសន៍ថា ការដែលលោកខិតខំរៀបចំឲ្យព្រឹទ្ធាចារ្យ ចាប៉ីដងវែង ទាំងប្រាំរូបបានជួបគ្នា គឺដោយសារលោកចង់លើកទឹកចិត្តលោកឲ្យបានជួបសួរសុខទុក្ខគ្នា ព្រោះគាត់មិនដែលបានជួបគ្នាក្នុងលក្ខណៈបែបនេះឡើយ។
លោកបន្តថា ចំណុចសំខាន់មួយទៀត គឺលោកចង់បង្ហាញពីការចាប់អារម្មណ៍ និងលើកទឹកចិត្តពួកគាត់កុំឲ្យគាត់មានអារម្មណ៍ថា អ្នកសិល្បៈចាប៉ីដងវែងនៅឯកាមិនសូវទទួលបានការចាប់អារម្មណ៍ពីកូនខ្មែរជំនាន់ក្រោយ។
តារាចម្រៀងរូបនេះបន្តថា សកម្មភាពខាងលើលោកក៏មានគោលបំណងចង់បំផុសឲ្យកូនខ្មែរ ជាពិសេសក្រសួងពាក់ព័ន្ធគួរយកចិត្តទុកដាក់មកលើព្រឹទ្ធាចារ្យ ចាប៉ីដងវែង ឲ្យបានច្រើន ព្រោះពួកគាត់ជាសម្បត្តិវប្បធម៌មនុស្សរស់ ហើយក៏មានមិនច្រើននាក់ដែរ ដូច្នេះហើយប្រសិនបើមានការលើកទឹកចិត្តពួកគាត់បានដិតដល់ តម្លៃនៃសិល្បៈខ្មែរមួយនេះ ក៏ប្រសើរឡើងផងដែរ។
លោក សន វិជ្ជបុត្រ ដោយការយល់ឃើញនូវចំណុចទាំងនេះហើយ ទើបលោកខិតខំកៀរគររកជំនួយពីបងប្អូនក្នុង និងក្រៅស្រុក រួមជាមួយថវិកាផ្ទាល់ខ្លួនលោកធ្វើកម្មវិធីនេះឡើង ហើយការរៀបចំឲ្យព្រឹទ្ធាចារ្យ ចាប៉ីដងវែង ទាំងប្រាំរូបជួបគ្នានេះ ក្រៅពីឲ្យពួកគាត់ញ៉ាំអាហារជុំគ្នា លោកបានរៀបចំអំណោយគ្រឿងបរិភោគ និងសម្ភារប្រើប្រាស់ និងប្រាក់ម្នាក់ចំនួនមួយរយដុល្លារផងដែរ៕
ផ្តល់សិទ្ធិដោយ៖KQUBE
