√ សោកនាដកម្មនៅឥណ្ឌា ៣៦នាក់ស្លាប់ រាប់សិបនាក់របួសដោយសាររថភ្លើងធ្លាក់ផ្លូវ

ជាច្រើនលើកច្រើនសារនៃការរអិលកង់រថភ្លើងដឹកអ្នកដំណើរ ដោយសារខ្វះស្តង់ដានៃការកសាងផ្លូវដែក ដែលនាំឲ្យអ្នកដំណើររាប់ពាន់នាក់បានស្លាប់ ដោយកាលពីយប់ថ្ងៃសៅរ៍ កន្លងមកនេះ មានហេតុការណ៍រថភ្លើងដឹកអ្នកដំណើរមួយគ្រឿង បានរអិលធ្លាក់ផ្លូវដ៏រន្ធត់ នៅខាងត្បូងប្រទេសឥណ្ឌា បណ្ដាលឲ្យសង្កិនមនុស្សស្លាប់ជាង៣៦នាក់ និងរាប់សិបនាក់ផ្សេងទៀតរងរបួសផងដែរ។

យោងតាមគេហទំព័រព័ត៌មាន CNBC បានចុះផ្សាយកាលពីថ្ងៃអាទិត្យទី២២ ម្សិលមិញថា រថភ្លើងដឹកអ្នកដំណើរមួយគ្រឿងនេះ បានដឹកជញ្ជូនអ្នកដំណើរពីទីក្រុង Jagdalpur ឆ្ពោះទៅកាន់ទីក្រុង Bhubaneswar ខណៈពេលដែលជិតដល់ស្ថានីយរថភ្លើង Kuneri ប្រមាណជា៣៥ គីឡូម៉ែត្រ ពីរដ្ឋ Andhra Pradesh ភ្លាមៗនោះបានរអិលធ្លាក់ចេញពីផ្លូវដែក បណ្ដាលឲ្យ អ្នកដំណើរបោកទង្គិចក្បាល និងសង្កិនស្លាប់យ៉ាងហោចណាស់ ៣៦នាក់ និងជាច្រើននាក់ផ្សេងទៀតរងរបួសជាទម្ងន់។

ក្រុមនគរបាលរដ្ឋ Andhra Pradesh បានឲ្យដឹងថា កម្លាំងរបស់ពួកគេកំពុងគាស់ និងទាញរថភ្លើងនោះចេញពីគំនរបាក់បែក ដើម្បីធ្វើការស៊ើបអង្កេត និងរកចំនួនមនុស្សស្លាប់ជាបន្តទៀតផងដែរ។

គួរបញ្ជាក់ថា គ្រោះថ្នាក់ដដែលៗនេះ បានបង្កឲ្យមានសោកនាដកម្ម ជាច្រើនលើកច្រើនសារកន្លងមកហើយ ដោយរាប់រយនាក់ទើបតែបានស្លាប់នៅចុងឆ្នាំ២០១៦ ហើយមកដល់ឆ្នាំ២០១៧នេះ ចំនួនអ្នកដំណើរសរុប ២៧,៥៨១នាក់បាត់បង់ជីវិត យ៉ាងណាមិញរដ្ឋាភិបាលឥណ្ឌានៅតែមិនអាចទប់ស្កាត់បាន ដែលនាំឲ្យចំនួនប្រជាជន និងភ្ញៀវទេសចរណ៍នៅក្នុងប្រទេសមានការថយចុះ៕