ខេត្តកណ្ដាល៖ នៅព្រឹកនេះថ្ងៃទី២០ មករា២០១៧ ខាងមុខផ្សារគគីរ ផ្លូវជាតិលេខ១ ក្នុងភូមិគគីរ ឃុំគគីរ ស្រុកកៀនស្វាយ ខេត្តកណ្តាល។ ខណៈ ២នាក់ប្តី-ប្រពន្ធ បានរងរបួសធ្ងន់ស្រាល ដោយសារកំពុងជិះម៉ូតូ ស្រាតែកង់រថយន្តកុងតឺន័របូត រមោលមកបុកចំពេញទំហឹង បណ្តាលឲ្យដួលម៉ូតូដេករដូករណែលតែម្តង។
ជនរងគ្រោះជាប្តី ត្រូវបានគេស្គាល់ថា មានឈ្មោះ ញែម សារ៉ុម អាយុ៥៥ឆ្នាំ រស់នៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល រងរបួសបាក់ជើងឆ្វេងម្ខាង ។
បើយោងតាមលោក ហង្ស ផារ៉ាណា នាយផ្នែកចរាចរណ៍ស្រុក បានឲ្យដឹងថា មុនពេលកើតហេតុ ជនរងគ្រោះទាំង២នាក់ បានជិះម៉ូតូ១គ្រឿង ធ្វើដំណើរតាមបណ្តោយផ្លូវខាងលើ មកដល់ចំណុចកើតហេតុ ស្រាប់តែមានរថយន្តកុងតឺន័រ១គ្រឿង ពណ៍ក្រហម ពាក់ស្លាកលេខ ភ្នំពេញ3C-7020 ចេញពីភ្នំពេញទៅអ្នកលឿង បានរបូតកង់ក្រោយ រួចរមៀលទៅបុកចំម៉ូតូដួល បណ្តាលឲ្យមនុស្សរងរបួសធ្ងន់ម្នាក់ និងស្រាលម្នាក់តែម្តង។
ក្រោយពេលកើតហេតុសមត្ថកិច្ចជំនាញ បានចុះទៅធ្វើការវាស់វែង និងបញ្ជូនជនរងគ្រោះទៅមន្ទីរពេទ្យ។ ដោយឡែករថយន្ត បានអូសយកទៅរក្សាទុកនៅអធិការស្រុក រង់ចាំដោះស្រាយបន្ត៕
ផ្តល់សិទ្ធិដោយ៖VD7News.com
