Sponsor

ប៉ូលិស​ ថៃ​ ចាប់​បាន​ស្ដេច​ថ្នាំញៀន​ធំ​បំផុត​ជនជាតិ​ ឡាវ​ ក្នុង​ទី​ក្រុង​ បាងកក​ ក្រោយពី​ស្ដេច​ថ្នាំញៀន​ ចុះ​ពី​យន្តហោះ​ភ្លាម​ នៅ​លើ​អាកាស​យានដ្ឋាន​សុវណ្ណភូមិ​ក្នុង​ទីក្រុង​ បាងកក​ ក្រោម​ផែនការ​ឆ្មក់​ចាប់​ខ្លួន​ ទ្រង់​ទ្រាយ​ធំ​បំផុត​ ដែល​ប៉ូលិស​ ថៃ​ បាន​ដាក់​ពង្រាយ​កង​កម្លាំង​បង្កប់​រាប់​រយ​នាក់​ នៅ​ជុំវិញ​អាកាសយានដ្ឋាន ។

សកម្មភាព​ចាប់​ខ្លួន​ធ្វើ​ឡើង​ក្នុង​ពេល​ដែល​មនុស្ស​ម្នាក់​ពុង​ធ្វើ​ដំណើរ​ក្នុង​អាកាស​យានដ្ឋាន​សុវណ្ណភូមិ​ ដោយ​កម្លាំង​បង្កប់​ បាន​ចេញ​មក​ពី​គ្រប់​ទិសទី​ សំដៅ​ទៅ​រក​ស្ដេច​ថ្នាំញៀន​ ដែល​កំពុង​ដើរ​ដោយ​មិន​ដឹង​ខ្លួន ។​

អធិការ​ប៉ូលិស​ប្រឆាំង​ថ្នាំញៀន​ ថៃ​ បញ្ជាក់​ថា​ ភ្នាក់ងារ​សម្ងាត់​បាន​តាមដាន​ស្ដេច​ថ្នាំញៀន​ឈ្មោះ​ សាយ៉ាសាណា​ (Xayasana) ​អាយុ​ ៤១​ ឆ្នាំ​ ជនជាតិ ​ឡាវ ​អស់​ពេល​ដ៏​យូរ ។​ សាយ៉ាសាណា ​គឺ​ជា​មេខ្លោង​ថ្នាំញៀន​ ដែល​មាន​បណ្ដាញ​ចែក​ចាយ​នៅ​ទូទាំង​ អាស៊ីអាគ្នេយ៍​ ប៉ុន្តែ​សហប្រតិបត្តិការ​រវាង​ប៉ូលិស​ ថៃ​ និង​ប៉ូលិស​ ឡាវ​ ព្រមទាំង​ព័ត៌មាន​បាន​មក​ពី​ប្រទេស​ សិង្ហបុរី​ បាន​ឈាន​ទៅ​ដល់​ការ​ចាប់​ខ្លួន​ សាយ៉ាសាណា ។

​ កុម្ម៉ង់ដូ​ ថៃ​ ធ្លាប់​បាន​ឆ្មក់​ចូល​អគារ​ជាង ​២០​ កន្លែង ​ដើម្បី​ចាប់​ខ្លួន​ សាយ៉ាសាណា ​ប៉ុន្តែ​មិន​បាន​ជោគ​ជ័យ​ឡើយ ​ព្រោះតែ​ស្ដេច​ថ្នាំញៀន ​មាន​បណ្ដាញ​គ្រប់​ទី​កន្លែង ​ដែល​អាច​ឲ្យ​មេខ្លោង​ថ្នាំញៀន​គេច​ផុត​ពី​ការឡោមព័ទ្ធ​ជាច្រើន​លើក ។​ សាយ៉ាសាណា​ គឺ​ជា​ស្ដេច​ថ្នាំញៀន​ទី​ ៤​ ដែល​ត្រូវ​បាន​ចាប់​ខ្លួន​ក្នុង​ប្រទេស ថៃ ក្នុងចំណោម​ស្ដេច​ថ្នាំញៀន​ទាំង ​៩​ រូប ​ដែល​ប៉ូលិស​ថៃ​កត់​ចូល​ក្នុង​បញ្ជី​ឧក្រិដ្ឋជន​ធំ​បំផុត ។​

ប្រភពៈ​ khaosodenglish​

ផ្តល់សិទ្ធិដោយ៖KQUBE

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor