សិល្បៈ ៖ បទចម្រៀង Original Song បទ Dance and Smile របស់ មាស សុខសោភា លោក T O និង Pempo បានចេញជា Audio និង Trailer ច្រើនមកហើយ។ បទនេះក៏ជាបទចម្រៀងផលិតឡើងស្ថិតក្នុងលំដាប់ Grade A របស់ផលិតកម្ម ថោន ដែលទទួលបានការគាំទ្រខ្លាំងពីសំណាក់ទស្សនិកជនប្រចាំឆ្នាំ២០១៦។
ដោយឡែកទុនផលិត MV បទនេះ ត្រូវបានលោក អ៊ិន រិទ្ធចិត្រ បានទម្លាយប្រាប់ថា បានចំណាយខ្ពស់ទ្វេដងបើធៀបទៅនឹងបទផ្សេងទៀត។ អ្នកគ្រប់គ្រងការផលិតរូបនេះបន្តថា បទ Dance and Smile របស់ មាស សុខសោភា T O និង Pempo មួយនេះបានប្រើរយៈពេលផលិតជាច្រើនខែ នឹងទើបតែសម្រេចបានមួយរយភាគរយកាលពីបីថ្ងៃមុននេះទេ ហើយ MV បទដដែលថតអស់រយៈពេលមួយយប់ពីរថ្ងៃ និងបានចំណាយទឹកប្រាក់សរុបជាងពីរពាន់ដុល្លារ។
លោកបន្តថា MV មួយបទនេះក្រៅពីច្នៃម៉ូដសំលៀកបំពាក់ច្រើនម៉ូដសម្រាប់តារាចម្រៀង និងអ្នករាំ ក៏មានរៀបចំឆាក និងដឹកនាំថតយ៉ាងសម្រិតសម្រាំងផងដែរ។ លោក អ៊ិន រិទ្ធចិត្រ បញ្ជាក់បន្ថែមថា តាមគ្រោងបទចម្រៀងខាងលើមិនទាន់បានចេញលក់ជា VCDទេ គឺត្រូវចេញនៅក្នុង Vol ទី៨៤ ដែលគ្រោងចេញនៅមុនពេលចូលឆ្នាំខ្មែរខាងមុខ ៕
វីដេអូ៖
ផ្តល់សិទ្ធិដោយ៖KQUBE
