រាជធានីភ្នំពេញ៖ ក្រោយភាពចម្រូងចម្រាសដ៏ស្មុគស្មាញនៃជម្លោះរវាងលោក ឌិន ពុទ្ធី ដែលជាប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ជាមួយលោក ឈាន ពិសិដ្ឋ នាយរងប៉ុស្តិ៍ច្រកទ្វារព្រំដែនអន្តរជាតិប៉ោយប៉ែតនោះ បន្ទាប់សភាស៊ើបសួរតុលាការសាលាឧទ្ធរណ៍ បានសម្រេចដោះលែងឲ្យមានសេរីឡើងវិញ។
យោងតាមសំដីលោក គីម សុជាតិ មេធាវីការពារក្ដីលោក ឌិន ពុទ្ធី បញ្ជាក់កាលពីព្រឹកថ្ងៃទី១៣ ខែមករានេះ ក្រោយបើកសវនាការជាអសាធារណៈ លោក ងួន រតនា ប្រធានក្រុមប្រឹក្សាជំនុំជម្រះសភាស៊ើបសួរសាលាឧទ្ធរណ៍ សម្រេចដោះលែងលោក ឌិន ពុទ្ធី ឲ្យនៅក្រៅឃុំបណ្ដោះអាសន្ន ដោយភ្ជាប់លក្ខខណ្ឌ ពោលគឺមិនត្រូវផ្លាស់ប្ដូរទីលំនៅ និង ត្រូវចូលបំភ្លឺតាមដីកាកោះរបស់តុលាការ ជាដើម៕
ផ្តល់សិទ្ធិដោយ៖KQUBE
