បន្ទាប់ពីគេហទំព័រ Kqube.net បានចុះផ្សាយថា អតីតអ្នកចម្រៀងចាប៉ីដងវែង ដែលទទួលបានចំណាត់ថ្នាក់លេខ២ លោកតា សួន សាន ធ្លាក់ខ្លួនជាអ្នកសុំទានតាមថ្នល់ ជារបរចិញ្ចឹមជីវិត ខណៈដែលមានវីដេអូជាក់ស្ដែង ដែលលោកតាជិះលើរទេះ ហើយប្រជាពលរដ្ឋជាច្រើន បានជួយឧបត្ថម្ភលុយបន្តិចបន្តួចមកនោះ ព័ត៌មាននេះបានធ្វើឲ្យមជ្ឈដ្ឋានជាច្រើន សម្ដែងការអាណិតអាសូរ ពីខ្សែជីវិតដ៏កម្សត់របស់លោកតា។
តែលោកតាបញ្ជាក់ថា គឺលោកដឹងចិត្តរបស់ពលរដ្ឋខ្មែរ ថាតើពួកគាត់មានអារម្មណ៍បែបណា ពេលឃើញគាត់ដុនដាបដល់ថ្នាក់នេះ តែធាតុពិតលោកតាពិតជាធ្លាក់ខ្លួនក្ររហូតដល់កម្រិត០ពិតមែន។ ប៉ុន្តែនៅល្ងាចនេះ ពេលធ្វើបទសម្ភាសជាមួយ Kqube.net បន្ថែម លោកតា សួន សាន បានរៀបរាប់ប្រាប់ពីជីវិតទីទាល់របស់លោកតាថា លោកបានធ្លាប់ខ្លួនឈឺមានរយៈពេល៣ឆ្នាំមកហើយ គឺស្ពឹកនិងចុកចាប់ដៃជើង ហើយជំងឺនេះលោកក៏បានទៅពេទ្យធំៗច្រើនលើកមកហើយដូចជា មន្ទីរពេទ្យ រុស្សី កាលម៉ែត្រ រហូតអស់ទ្រព្យពីខ្លួន ប៉ុន្តែលទ្ធផលពេទ្យបានប្រាប់ថា គ្មានជំងឺអ្វីទៅវិញ។
លោកតា សួន សាន បន្តថា នៅពេលព្យាបាលនៅពេទ្យមិនធូរស្រាល លោកក៏បានងាកមករកគ្រូខ្មែរម្តងវិញ ក្រែងមានលទ្ធផល ហើយពីម្សិលម្ងៃនេះ លោកបានទៅយកថ្នាំពីគ្រូខ្មែរនៅម្តុំវត្តដំបូងខ្ពស់ ខណៈនោះពេលចុះពីឡានឈ្នួលលោកមិនឲ្យចៅរុញរទេះទេ គឺលោកតាចង់ប្រើរទេះដោយខ្លួនឯង ព្រោះចង់ដឹងថា ក្នុងនាមលោកតាជាអ្នកសិល្បៈម្នាក់ធ្លាក់ខ្លួនទៅជាបែបនេះ តើបងប្អូនខ្មែរមានអារម្មណ៍យ៉ាងណាសម្រាប់រូបគាត់ ពេលនោះក៏មានបងប្អូនគាត់អាណិតអាសូរជូនលុយជាច្រើននាក់ ហើយលោកក៏បានឲ្យពរគេជាទំនុកចាប៉ីអញ្ចឹងទៅ។
អតីតអ្នកច្រៀងចាប៉ីដងវែងរូបនេះបន្តថា ពេលនោះក៏មានអ្នកខ្លះថតគាត់ផុសក្នុងហ្វេសប៊ុក ដែលធ្វើឲ្យមានការយល់ថាលោកជាអ្នកសុំទានតែម្ដងទៅ តែធាតុពិតលោកមិនបានតាំងចិត្តសុំទានទេ ទោះជាខ្លួនធ្លាក់ដុនដាប់យ៉ាងក៏ដោយ។ លោកតាបន្តថា បើនិយាយពីជីវភាពគឺ លោកតាធ្លាក់ដល់ចំណុចសូន្យតែម្តង ពោលគឺអ្នកសុំទានខ្លះគាត់អាចមានលុយ១ពាន់រៀលក្នុងហោប៉ៅ តែសម្រាប់រូបលោកតា ពេលខ្លះគឺគ្មានទាំងលុយ១ពាន់រៀលក្នុងហៅប៉ៅផង តែទោះយ៉ាងណាលោកនៅតែជម្នះរស់ ព្រោះសង្ឃឹមក្រែងថ្ងៃក្រោយជំងឺជាសះស្បើយ អាចចាប់កាន់ចាប៉ី ច្រៀងជូនបងប្អូនខ្មែរបានស្ដាប់បន្តទៀត៕
ផ្តល់សិទ្ធិដោយ៖KQUBE
