រាជធានីភ្នំពេញ៖ ស្ទើរតែគ្រប់ដំបូលផ្ទះទៅហើយ ដែលគ្រួសារនីមួយមានសមាជិកដែលបានស្លាប់ដោយសារការ ឧបទ្ទវហេតុគ្រោះថ្នាក់ចរាចរណ៍ វាបានកើតឡើងគ្រប់រូបភាព និងមានមូលហេតុខុសៗគ្នា។
ក្នុងវីដេអូអប់រំខ្លី ដែលបានផលិតឡើងដោយក្រសួងសាធារណការនេះ ពិតជានឹងចាក់ដោតដល់អារម្មណ៍បេះដូងរបស់អ្នកដែលមានសមាជិកស្លាប់ដោយសាររឿងចរាចរណ៍នេះមិនខាន។ សូមគិតថា ប្រសិនអ្នកស្លាប់ទៅ តើគ្រួសាររបស់អ្នកនឹងទៅជាយ៉ាងណា? ប្រពន្ធអ្នក កូនរបស់អ្នក ពួកគេពឹងផ្អែកលើអ្នក អ្នកជាមេបង្គោលក្នុងសង្គមគ្រួសារ នៅពេលដែលអ្នកជាបង្គោលដួលទៅ តើអោយរនួត ជញ្ជាំង...ទ្រទ្រង់បានយូរប៉ុណ្ណា!!
"គិតដល់ជីវិតអ្នក និងអ្នកដទៃ ពិសារគ្រឿងស្រវឹងសូមកុំបើកបរ" ជាពាក្យស្លោកក្នុងវីដេអូខាងលើ។ តាមរបាយការណ៍នៅឆ្នាំ២០១៥ ប្រទេសកម្ពុជាបានទទួលគ្រោះថ្នាក់ចរាចរណ៍មានប្រមាណជាង ៤,៥១៩ករណី បណ្ដាលឱ្យស្លាប់និងរបួសចំនួន១៣,៦៤៩នាក់។
ពលរដ្ឋប្រមាណ២,២៣១នាក់ បានស្លាប់ដោយគ្រោះថ្នាក់ចរាចរណ៍ទាំងនេះ៤៧% ក្នុងចំណោមជនរងគ្រោះទាំងនោះ មានអាយុចន្លោះពី១៥ ដល់ ២៩ឆ្នាំ អ្នកជិះម៉ូតូមានចំនួន៧១% ក្នុងចំណោមជនរងគ្រោះដែលស្លាប់ទាំងអស់ គិតជាមធ្យម កម្ពុជាមានមនុស្សចំនួន៦នាក់ បានស្លាប់និង១៥នាក់បានរងរបួសធ្ងន់ធ្ងរ ក្នុងមួយថ្ងៃៗ នៅក្នុងឆ្នាំ២០១៥។
ក្នុងរបាយការណ៍នោះបញ្ជាក់ទៀតថា ចាប់តាំងពីឆ្នាំ២០១១មកគ្រោះថ្នាក់ចរាចរណ៍ បណ្ដាលឱ្យមនុស្សស្លាប់មានការកើនឡើង១៧% នៅកម្ពុជា។ ក្នុងរយៈពេល១០ឆ្នាំចុងក្រោយ (២០០៥-២០១៥)នេះ ចំនួនអ្នកស្លាប់បានកើនឡើងទ្វេដងក្នុងរយៈពេលដូចគ្នា ឯចំណែកចំនួនប្រជាជនមានការកើនឡើងត្រឹមតែ១៦%ប៉ុណ្ណោះ៕
ទស្សនា វីដេអូអប់រំខាងក្រោមនេះ៖
ផ្តល់សិទ្ធិដោយ៖KQUBE
