ក្រោយកើតហេតុអស់រយៈពេលជាច្រើនថ្ងៃមក ឃើញថាសមត្ថកិច្ចបានខិតខំ ប្រឹងប្រែងស៊ើបអង្កេតអស់ពីសមត្ថភាពដើម្បី ចាប់ខ្លួន ចោរប្លន់ដៃឆៅ បាញ់សម្លាប់ បុរសម្នាក់ដែលបានបើករថយន្តឡុចសិសបុកចោរទាំងនោះ ហើយប្លន់ទ្រព្យនារីជាគូរដណ្ដឹង កាលពីយប់ថ្ងៃទី២១ ខែមករា ឆ្នាំ២០១៧កន្លងទៅ មានករណីតាមប្លន់ដល់មុខផ្ទះ ស្ថិតនៅក្បែរសុវណ្ណា ខណ្ឌចំការមន។
នៅព្រឹកថ្ងៃទី២៦ ខែមករា ឆ្នាំ២០១៧នេះដែលភ្នាក់ងារគេហទំព័រខេឃ្យូប (Kqube.net) បានទទួលព័ត៌មានថា កិច្ចសហការរវាងកម្លាំងនគរបាលព្រហ្មទណ្ឌកម្រិតធ្ងន់រាជធានីភ្នំពេញ កម្លាំងនគរបាលខណ្ឌចំការមន ជាមួយកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ក្រោមការសម្របសម្រួលពី លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ពេលនេះសមត្ថកិច្ចបានឃាត់ខ្លួន ក្រុមចោរនោះបាន២នាក់ហើយ។ ជនដៃដល់ដែលបាញ់សម្លាប់ជនរងគ្រោះឈ្មោះ អ៊ុំ សួស្ដី ហៅ ពៅក្បាលធំ និងម្នាក់ទៀតឈ្មោះ ចាន់ សុវណ្ណ ហៅប៉ែត។
ក្នុងសន្និសីទសារព័ត៌មាននោះ ឃាតក អុំ សួស្ដី បានប្រាប់អ្នកសារព័ត៌មានថា ពួកគេបានតាមរថយន្តរបស់ជនរងគ្រោះពីស្តុបអ៊ីនធឺខន ហើយបានបាញ់ចំនួន៥គ្រាប់ ព្រោះខឹង ម្ចាស់រថយន្តនោះបានបើកឡានបុកដៃគូពួកគេ ហើយអាវុធនិងអាយឌី វិទ្យុទាក់ទងគឺគេបានទិញពីអ្នកតាខ្មៅ ។
សមត្ថកិច្ចនគរបាលបានបញ្ជាក់ផងដែរថា នៅមានបក្សពួកគ្នា មានចំនួន៤នាក់ ចំណែកឯ២នាក់ទៀត កំពុងតាមចាប់ខ្លួន និងសូមអំពាវនាវឲ្យប្រជាជនមានភាពកក់ក្ដៅ ចំពោះសមត្ថកិច្ចដែលនឹងថែរក្សាសុខសន្តិភាពជូន។
វត្ថុតាងសមត្ថកិច្ចដកហូតបានមានអាវុធ៣ដើម M16កាត់០១ដើម, ម៉ាក Bareta ចំនួន០១ដើម និងមួយដើមទៀត ប្រភេទអាវុធខ្លី មិនស្គាល់ម៉ាក ។ ជនសង្ស័យទាំង២នាក់ ត្រូវបានឃាត់ខ្លួន កាលពីម៉ោង១៣៖៣០នាទី ថ្ងៃទី២៥ ខែមករា ឆ្នាំ២០១៧ នៅបន្ទប់ជួលលេខ០០១ ផ្លូវទ្រុងមាន់ ភូមិតាងៅ សង្កាត់និរោធ ខណ្ឌច្បារអំពៅ ។
ផ្តល់សិទ្ធិដោយ៖KQUBE
