ក្នុងថ្ងៃបុណ្យមាឃបូជានេះ ក្រុមហ៊ុន Facebook បានបង្ហាញការចូលរួមរបស់ខ្លួនដោយមានរូបភាពព្រះច័ន្ទពេញវង់ និងផ្កាឈូក ព្រមទាំងពន្លឺភ្លើងទាន រួមជាមួយនឹងពាក្យជូនពរថា “សម្រាប់ការឧទ្ទិសបួងសួង ក្នុងថ្ងៃបុណ្យមាឃបូជា យើងទាំងអស់គ្នាសូមសម្ដែងនូវក្ដីគោរពចំពោះឱវាទរបស់ព្រះពុទ្ធ ដោយយើងទាំងអស់គ្នា សូមឲ្យមាននូវសមាធិចិត្តប្រកបដោយបុណ្យ និងភាពស្ងប់ក្នុងអារម្មណ៍” ។
បុណ្យមាឃបូជា ជាពិធីបុណ្យមួយសំខាន់បំផុតនៅក្នុងព្រះពុទ្ធសាសនា ។ ពិធីបុណ្យនេះ មានការប្រារព្ធឡើងដោយអ្នកកាន់សាសនាព្រះពុទ្ធនៅទូទាំងពិភពលោក ។ ពិធីបុណ្យនេះ ប្រារព្ធឡើងនៅថ្ងៃ ១៥ កើតខែមាឃ នៃចន្ទគតិរៀងរាល់ឆ្នាំ ។
ការប្រារព្ធពិធីបុណ្យនេះ ក្នុងបំណងរំឭកដល់ព្រឹត្តិការណ៍ ២ សំខាន់ៗនៅក្នុងព្រះពុទ្ធសាសនាគឺ៖
១–រំឭកដល់ថ្ងៃ ចតុរង្គសន្និបាត ជាពេលដែលភិក្ខុសង្ឃទាំង ១២៥០ អង្គ សុទ្ធតែជាព្រះអរន្តជួបជុំគ្នានៅថ្ងៃ ១៥ កើត ខែមាឃ នៅក្នុងវត្តវេឡុវ័ន ក្រុងរាជគ្រឹះ មគធរដ្ឋ ក្នុងសម័យសព្វថ្ងៃនេះសំដៅត្រង់ប្រទេសឥណ្ឌា ដែលហៅថា ប៊ិហារ (វិហារ)។
២–រំឭកដល់ថ្ងៃព្រះពុទ្ធដាក់អាយុសង្ខារ គឺពេលនោះព្រះអង្គមានព្រះជន្ម បើគិតតាមឈ្មោះខែ នៅខ្វះប្រហែល ៤ ខែ និងបើគិតតាមចំនួនថ្ងៃ នៅខ្វះ ៨៨ថ្ងៃ ទៀត នឹងគម្រប់ ៨០ឆ្នាំគត់ កាលពី ៥៨៨ឆ្នាំ មុនគ្រិស្តសករាជ ។
ផ្តល់សិទ្ធិដោយ៖KQUBE
