រាជធានីភ្នំពេញ៖ ដើម្បីឲ្យអស់មន្ទិលសង្ស័យរបស់បងប្អូនប្រជាពលរដ្ឋពិសេសមិត្តអ្នកលេងក្នុងបណ្តាញសង្គមនោះ នៅល្ងាចថ្ងៃទី៣០ ខែមីនាម្សិលមិញនេះ អគ្គស្នងការរងនគរបាលជាតិ លោកឧត្ដមសេនីយ៍ឯក ហ៊ឹម យ៉ាន បានបញ្ជាក់ប្រាប់ដឹងសារជាថ្មីថា អ្នកមិនបានកាត់ឈ្មោះ គឺមិនមានការពិន័យទេ។
ការបញ្ជាក់ពាក្យសម្តីរបស់ខ្លួនសារជាថ្មីនេះ បានឡើងបន្ទាប់ពីមានប្រតិកម្មនិងជាចម្ងល់របស់សាធារណជនពាក់ព័ន្ធនឹងការប្រកាសរបស់លោកថា អ្នកមិនកាត់ឈ្មោះយានយន្តត្រូវផាកពិន័យព្រមទាំងប្រឈមនឹងទោសទណ្ឌ ដែលការលើកឡើងនេះផ្ទុយពីសេចក្តីជូនដំណឹងរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ចុះថ្ងៃទី០៩ ខែមករាឆ្នាំ២០១៦ ត្រង់ឃ្លាថា“ រាជរដ្ឋាភិបាលសម្រេចទទួលស្គាល់ការកាន់កាប់ជាក់ស្ដែងដោយមិនតម្រូវឲ្យមានការបញ្ជាក់ពីម្ចាស់ដើមឡើយ”។
លោកឧត្ដមសេនីយ៍ឯក ហ៊ឹម យ៉ាន អគ្គស្នងការរងនគរបាលជាតិ បានបញ្ជាក់យ៉ាងដូច្នេះថា គ្រប់ម្ចាស់យានយន្តទាំងឡាយណាដែលមិនមានកាត់ឈ្មោះ គឺមិនមានការពិន័យ ឬប្រឈមនឹងមានទោសទណ្ឌជាមួយផ្លូវច្បាប់នោះទេ ប្រសិនណាជាមិនបានប្រព្រឹត្តបទល្មើសចរាចរណ៍ និងគ្រោះចរាចរណ៍ផ្សេងៗ។
ហើយការមិនបានផ្ទេរកម្មសិទ្ធិវិញ ក៏មិនទទួលការផាកពិន័យដែរ គ្រាន់តែម្ចាស់យានយន្តបង្ហាញ ពីឯកសារទិញ-លក់ដល់សមត្ថកិច្ចទៅបានហើយ ប៉ុន្តែវានៅតែមានផលវិបាកខាងផ្លូវច្បាប់បន្តិចចំពោះម្ចាស់យានយន្តមិនបានកាត់ឈ្មោះ ព្រោះប្រសិនបើយានយន្តទាំងនោះមានជាប់ពាក់ព័ន្ធបទល្មើសចរាចរណ៍។
ជាក់ស្ដែងអគ្គស្នងការនគរបាលជាតិ នឹងធ្វើការកែសម្រួលវិធានការពិន័យចំពោះអ្នកបើកបរល្មើសល្បឿនកំណត់ ដោយលែងបញ្ឈប់យានយន្តល្មើសតាមផ្លូវ ដើម្បីចេញបង្កាន់ដៃពិន័យទៀតហើយ គឺងាកមកប្រើប្រាស់ទិន្នន័យចុះបញ្ជីយានយន្ត សម្រាប់បញ្ជូនបង្កាន់ដៃពិន័យ និងរូបថត យានយន្តល្មើសល្បឿន ទៅកាន់អាសយដ្ឋានម្ចាស់យានយន្ត ឲ្យទៅបង់ប្រាក់ពិន័យ នៅទីស្នាក់ការនគរបាលតែម្តងតែក្នុងករណីម្ចាស់យានយន្តមិនបានបង់ប្រាក់ពិន័យលើស ៩០ថ្ងៃ នឹងត្រូវបញ្ជូនសំណុំរឿងទៅតុលាការ៕
ផ្ដល់សិទ្ធិដោយ៖KQUBE
