រដ្ឋមន្ត្រីការពារជាតិកូរ៉េខាងត្បូងទើបបានបង្ហើបឲ្យដឹងថា នៅក្នុងសប្ដាហ៍នេះនាវាមុជទឹកអាមេរិកនឹងចូលរួមជាមួយនឹងនាវាផ្ទុកយន្តហោះចម្បាំង USS Carl Vinson ដើម្បីធ្វើសមយុទ្ធយោធាទ្រង់ទ្រាយដ៏ធំនៅសមុទ្រជុំវិញកោះផែនីស៊ូលា (Peninsula)។
ប្រភពដដែលបានបញ្ជាក់ថា នាវាមុជទឹកអាមេរិកប្រភេទ USS Michigan នឹងចូលទៅកាន់សមុទ្រផែនីស៊ូលា កូរ៉េខាងត្បូងក្នុងការចូលរួមសមយុទ្ធយោធាជាមួយនឹងនាវាផ្ទុកយន្តហោះចម្បាំងរបស់ខ្លួន ចំពេលដែលសង្គ្រាមពាក្យសំដីបានកើតឡើងរវាងទីក្រុងវ៉ាស៊ីនតោន និងព្យុងយ៉ាង លើបញ្ហាការគំរាមកំហែងអាវុធនុយក្លេអ៊ែររបស់មេដឹកនាំផ្ដាច់ការ លោក គីម យុងអ៊ុន។
ជុំវិញការគំរាមកំហែងយោធានេះ កូរ៉េខាងជើងបានលើកឡើងថា វត្តមានរបស់នាវាមុជទឹករបស់អាមេរិកគឺជាការបង្ករឿង ដោយបានព្រមានឆ្លើយតបត្រឡប់វិញដោយប្រើមីស៊ីលផ្លោងរបស់ខ្លួននាពេលដ៏ខ្លីខាងមុខនេះទៀតផង។ លើសពីនេះទៀតទីក្រុងព្យុងយ៉ាងសម្រេចបានមីស៊ីលផ្លោងចំនួន៦ដើម បូករួមទាំងមីស៊ីលបំពាក់ក្បាលគ្រាប់នុយក្លេអ៊ែរសមត្ថភាពបាញ់ឆ្លងទ្វីប (ICBM) ដែលអាចបាញ់ដល់សហរដ្ឋអាមេរិកផងដែរ៕
ប្រភព៖ Sputnik
