ក្រុមសារិកាព្រៃ Newcastle United បានត្រឡប់មកលេងក្នុងពានរង្វាន់លំដាប់កំពូលរបស់អង់គ្លេសវិញហើយកាលពីយប់មិញ ក្រោយពេលអវត្តមានរយៈពេលមួយរដូវកាល ខណៈដែលឡើងមកវិញដោយបានយកឈ្នះPreston ៤ទល់ ១។
២គ្រាប់របស់ Ayoze Perez មួយគ្រាប់របស់ Christian Atsu ខណៈគ្រាប់ទីបួនបានមកពីបាល់ពិន័យ១១ម៉ែត្ររបស់ Matt Ritchie បានធ្វើក្រុមរបស់លោក Rafa Benitez មាន៨៨ពិន្ទុ ឡើងមកលេខ២ក្នុងតារាងChampionship លើសក្រុមលេខ៣ Reading ៩ពិន្ទុ ហើយនៅសល់ពីប្រកួតក្នុងដៃទៀត។
ជ័យជម្នះនេះអាចសម្រេចអនាគតរបស់អតីតគ្រូបង្វឹក Liverpool និង Real Madrid ឲ្យនៅបន្តជាមួយ Newcastle បន្ទាប់ពីគាត់មកដឹកនាំក្លឹបមួយនេះ ហួសពេលទៅហើយ កាលពីរដូវកាលមុន។ Benitez នាំក្លឹបមួយនេះឡើងមកវិញក៏ចំណាយលុយមិនធម្មតាដែរ ដោយយោងឲ្យមកលេងនៅ Premier League វិញនេះ ត្រូវចំណាយលុយ៥០លានផោនដែលជាចំនួនច្រើនជាងគេ និងថ្លៃជាងគេបំផុតក្នុងប្រវត្តិសាស្ត្រChampionship។
ក្រៅពីក្រុមសារិកាព្រៃមួយនេះ Brighton ដែលឈរកំពូលតារាងបានឡើងមកលេងនៅ Premier League ជាលើកដំបូងក្នុងប្រវត្តិសាស្ត្ររបស់ខ្លួនកាលពីសប្ដាហ៍មុន៕
