បុរសជនជាតិ ថៃ ម្នាក់បានធ្វើឃាតកូនស្រីខ្លួនឯងអាយុទើបតែ ១០ ខែប៉ុណ្ណោះ ព្រមទាំងបានបង្ហោះសកម្មភាពនៃការធ្វើឃាតទារិកានោះតាម Facebook ថែមទៀត មុនពេលសម្លាប់ខ្លួនឯងដោយចងក ។ ឈ្មោះ វុទ្ធីសាន វង់តាឡេ (Wuttisan Wongtalay) បានបង្ហោះវីដេអូឃ្លីបចំនួន ២ បង្ហាញសកម្មភាពឃាតកម្មទៅលើកូនស្រីរបស់ខ្លួនដែលមានអាយុ ១០ ខែ ។
នាង ជីរ៉ានុច ទ្រីរ៉ាតាណា (Jiranuch Triratana) ប្រពន្ធរបស់ឃាតកនិយាយថា អ្នកទាំងពីររស់នៅជាមួយគ្នាដោយសុខសាន្តរយៈពេលមួយឆ្នាំ ប៉ុន្តែមួយរយៈពេលចុងក្រោយនេះ ប្ដីរបស់នាងមានសកម្មភាពហិង្សាញឹកញាប់ ពេលខ្លះវាយកូនប្រុសអាយុ ៥ របស់នាង ដែលជាកូនប្ដីមុន ។ នាង ជីរ៉ានុច បញ្ជាក់ថា នៅពេលប្ដីរបស់នាងខឹងសម្បារ នឹងមិនហ៊ានតបតឡើយ ប្រសិនបើនាងតបតនឹងត្រូវបានប្ដីធ្វើបាបកាន់តែខ្លាំង ។
វុទ្ធីសាន បានចងកកូនស្រីរបស់ខ្លួន ហើយទម្លាក់ពីដំបូលផ្ទះ រួចហើយបង្ហោះវីដេអូដែលថតដោយខ្លួនឯងតាម Facebook មុនពេលចងកធ្វើអត្តឃាត ។ ប៉ូលិសបានទៅដល់ផ្ទះកើតហេតុ និងទម្លាក់ចុះសាកសពឪពុក និងកូនស្រី ដែលបានស្លាប់ទាំងពីរនាក់ ។ ទោះយ៉ាងណា វីដេអូនៃសកម្មភាពឃាតកម្មត្រូវបានក្រុមហ៊ុន Facebook បិទមិនឲ្យសាធារណជនមើលតទៅទៀតឡើយ ក្រោយការបង្ហោះរយៈពេលប្រមាណ ២៤ ម៉ោង ។