យន្តហោះចម្បាំង F-35 របស់ អាមេរិក ត្រូវបានបញ្ជូនទៅដល់ប្រទេស អីុស្តូនៀ (Estonia)ក្រោមផែនការបង្កើនសមត្ថភាព NATO ក្នុងតំបន់បាល់ទិច ដែលជាការប្ដេជ្ញារបស់ទីក្រុង វ៉ាស៊ីនតោន ការពារបណ្ដាប្រទេសមានព្រំដែនជាប់ជាមួយប្រទេស រុស្ស៊ី ។
ការដាក់ពង្រាយយន្តហោះទំនើបបំផុតចុងក្រោយរបស់ អាមេរិក ក្បែរប្រទេស រុស្ស៊ី ព្រមទាំងការដាក់ពង្រាយសព្វាវុធផ្សេងៗ និងការបញ្ជូនកងទ័ពរាប់ពាន់នាក់ទៅលាន់ទីនោះ គឺជាការបង្ហាញនូវការគាំទ្រយ៉ាងខ្លាំងរបស់រដ្ឋាភិបាលទីក្រុង វ៉ាស៊ីនតោន ចំពោះសមាជិកNATO ដែលភ័យខ្លាចចំពោះអំណាចយោធា រុស្ស៊ី និងអាចលុបបំបាត់មន្ទិលសង្ស័យចំពោះលោក ដូណាល់ ត្រាំ អំពីការគាំទ្រ NATO ។
កាលពីដើមខែ មេសា កងទ័ពអាកាស អាមេរិក បានបញ្ជូន F-35 ទៅកាន់ទ្វីបអឺរ៉ុបសម្រាប់ការហ្វឹកហ្វឺនជាមួយសម្ព័ន្ធមិត្ត ។ ក្រោយពីប្រទេស រុស្ស៊ី ភ្ជាប់ឧបទ្វីប គី្រមៀ ទៅជាឧបសម្ពន្ធរបស់ខ្លួនក្នុងឆ្នាំ ២០១៤ ប្រទេសទាំងឡាយដែលមានព្រំដែនជាប់ រុស្ស៊ី ចាប់ផ្ដើមព្រួយបារម្ភ និងបានស្នើដល់សមាជិក NATO ឲ្យគាំទ្រផ្នែកយោធា ទប់ទល់នឹងការគំរាមពីប្រទេស រុស្ស៊ី ដែលអាចលុកលុយប្រទេសទាំងនោះនៅពេលណាមួយ ដូចដែលបានកើតឡើងទៅលើប្រទេស អ៊ុយក្រែន ។
បច្ចុប្បន្ន កងទ័ពអាកាស ទាហាន ម៉ារីន និងកងទ័ពជើងទឹក អាមេរិក កំពុងប្រើប្រាស់ F-35 ព្រមទាំងបានលក់យន្តហោះមួយចំនួនទៅឲ្យប្រទេស អូស្ត្រាលី អង់គ្លេស ន័រវែស អ៊ីតាលី ហុល្លង់ និង អ៊ីស្រាអែល ចំណែកប្រទេស ជប៉ុន ចាប់ផ្ដើមទទួលបានយន្តហោះទំនើបចុងក្រោយនេះសម្រាប់បំពាក់ដល់កងទ័ពរបស់ខ្លួន ។
ប្រភពៈ reuters