ប្រទេស ចិន បានសម្ពោធទម្លាក់នាវាផ្ទុកយន្តហោះថ្មីមួយគ្រឿងដែលគេមិនទាន់ស្គាល់ឈ្មោះចូលទឹកសមុទ្រដែលបានសាងសង់រួចរាល់ដោយវិស្វករ ចិនសម្រាប់ការប្រើប្រាស់របស់កងទ័ពជើងទឹក ធ្វើឲ្យប្រទេស ចិន មាននាវាផ្ទុកយន្តហោះពីរគ្រឿង ជាមួយនឹងនាវាផ្ទុកយន្តហោះ ឡាវនីង ដែលទិញពីប្រទេស អ៊ុយក្រែន ក្នុងឆ្នាំ ១៩៩៨ ។
សារព័ត៌មានរដ្ឋ ចិន ផ្សាយថា នាវាផ្ទុកយន្តហោះថ្មីនេះ ឌីហ្សាញឡើងនៅក្នុងប្រទេស ចិន និងសាងសង់នៅកំពង់ផែ ដាលៀន ភាគឥសាន្តប្រទេស ប៉ុន្តែនាវាផ្ទុកយន្តហោះនេះ នឹងមិនទាន់ដាក់ឲ្យប្រើប្រាស់នៅឡើយ ដោយរង់ចាំរហូតដល់ឆ្នាំ ២០២០ ។
ការសម្ពោធនាវាផ្ទុកយន្តហោះថ្មី ធ្វើឡើងចំខួបទី ៦៨ នៃការបង្កើតកងទ័ពជើងទឹកចិន និងជាពេលដែលឧបទ្វីបកូរ៉េកំពុងជួបនឹងភាពតានតឹងខ្លាំងរវាងប្រទេស កូរ៉េខាងជើង និង សហរដ្ឋអាមេរិក ចំពោះបញ្ហាកម្មវិធីអាវុធនុយក្លេអ៊ែរ និងមីស៊ីលរបស់ទីក្រុង ព្យុងយ៉ាង ។
រដ្ឋាភិបាលទីក្រុង ប៉េកាំង ឲ្យដឹងថា ការរចនានាវាផ្ទុកយន្តហោះនេះ ធ្វើឡើងតាមគំរូនាវាផ្ទុកយន្តហោះ ឡាវនីង ប៉ុន្តែនាវាថ្មីអាចផ្ទុកទម្ងន់ ៥ ម៉ឺនតោន និងមានសមត្ថភាពទទួលការចុះចតរបស់យន្តហោះចម្បាំង Shenyang J-15 ជាច្រើនគ្រឿង ។
រយៈពេលប៉ុន្មានឆ្នាំកន្លងទៅនេះ ប្រទេស ចិន ធ្វើទំនើបកម្មកងទ័ពជើងទឹកយ៉ាងឆាប់រហ័ស ដោយតែងតាំងមេបញ្ជាការកងទ័ពជាច្រើនរូប ព្រមទាំងបង្ហាញសកម្មភាពយោធាសំខាន់ៗ ចូលរួមដោយនាវាផ្ទុកយន្តហោះ និងនាវាចម្បាំងគ្រប់ប្រភេទក្នុងសមុទ្រចិនខាងត្បូង និងសមុទ្រចិនខាងកើត ។
ប្រភពៈ reuters