រាជធានីភ្នំពេញ៖ ក្នុងព្រឹត្តិការណ៍ អង្គរសង្ក្រាន្តឆ្នំា២០១៧ ដែលបានប្រារព្ធឡើង ដើម្បីអបអរសាទរ បុណ្យចូលឆ្នំាថ្មីប្រពៃណីខ្មែរ ក្នុងរយៈពេល៣ថ្ងៃនៅលើទឹកដីសៀមរាបនោះ ទទួលបានភ្ញៀវទេសចរប្រមាណជាង ១,៦លាន (១.៦៣១.៨០០) នាក់ ពោលបើធៀបទៅនឹងឆ្នំា២០១៦កន្លងទៅកើនឡើងជិត២៣ភាគរយ។ នេះយោងតាមប្រសាសន៍ឯកឧត្ដម រដ្ឋមន្រ្តីក្រសួងទេសចរណ៍។
បើតាមAKP ឯកឧត្តម ថោង ខុន បានគូសបញ្ជាក់ថា ក្នុងចំណោមភ្ញៀវទាំងនោះមានភ្ញៀវទេសចរជាតិមានប្រមាណ ១,៦លាននាក់កើនឡើងជាង ២៣ភាគរយ និងភ្ញៀវអន្តរជាតិប្រមាណ ៣១ ៨០០ នាក់ កើនជិត ៨ភាគរយ ហើយភ្ញៀវទេសចរទំាងនោះបានផ្តល់ប្រាក់ចំណូល ដល់ប្រជាពលរដ្ឋនៅក្នុងខេត្តសៀមរាបប្រមាណជា៩៥លានដុល្លារសហរដ្ឋអាមេរិក។
ឯកឧត្តមរដ្ឋមន្ត្រី បន្ថែមថា អង្គរសង្ក្រាន្តពិតជាព្រឹត្តិការណ៍វប្បធម៌អរូបីមួយ ដែលត្រូវបានរៀបចំឡើង នៅលើទឹកដីបេតិកភណ្ឌរូបី ដែលបានឆ្លុះបញ្ចាំង និងបង្ហាញអំពីវប្បធម៌ដ៏សម្បូរបែបរបស់កម្ពុជា ហើយបច្ចុប្បន្នកំពុងត្រូវបានយកចិត្តទុកដាក់ស្រាវជ្រាវ រុករកយកមកថែរក្សា និងអភិវឌ្ឍន៍។
សូមបញ្ជាក់ផងដែរថា ព្រឹត្តិការណ៍អង្គរសង្ក្រាន្តនេះត្រូវបានអាស៊ានដាក់បញ្ចូលទៅក្នុងយុទ្ធនាការ ទស្សនាអាស៊ានខួប លើកទី៥០ឆ្នាំ និងត្រូវបានអាស៊ានចាត់ទុកថា ជាព្រឹត្តិការណ៍ទេសចរណ៍ដ៏ទាក់ទាញ និងជាពិធីបុណ្យដ៏ធំមួយក្នុងចំណោម ពីធីបុណ្យ ដ៏ល្អបំផុតទាំង ៥០របស់អាស៊ាន ដែលអាស៊ានបានជ្រើសរើសនិងផ្សព្វផ្សាយ ដោយផ្អែកលើគុណ តម្លៃក្នុងការលើកស្ទួយការអភិរក្ស និងការលើកតម្លៃវប្បធម៌ និងទំនៀមទម្លាប់ តាមរយៈការអប់រំ ការចូលរួម និងការកម្សាន្តរីករាយ នាឱកាសពីធីបុណ្យចូលឆ្នាំថ្មីក្នុងនាមជាមហាគ្រួសារខ្មែរ ជាមួយភ្ញៀវទេសចរជាតិ- អន្តរជាតិ ប្រកបដោយស្មារតីសាមគ្គីភាព ភាតរភាព និងសុខដុមរមនីយកម្ម៕
