ខេត្តសៀមរាប៖ ចាប៉ីដងវែងដែលជាឧបករណ៍ភ្លេងបុរាណខ្មែរ និងត្រូវបានឯកឧត្តម សំហេង បុរស អនុប្រធានក្រុមការងារប្រតិបត្តិព្រឹត្តិការណ៍អង្គរសង្ក្រាន្ត បានប្រកាសក្នុងសន្និសីទការសែតកាលពីខែមុនថា នឹងក្លាយ វត្ថុតាំងបង្ហាញខ្នាតយក្សមួយនៅក្នុងព្រឹត្តិការណ៍អង្គរសង្ក្រាន្តនោះ នឹងបង្ហាញខ្លួនជាផ្លូវការហើយនៅថ្ងៃទី១២ ខែមេសា វេលាម៉ោង២៖០០រសៀល ស្អែកនេះ។
ចាប៉ីដងវែងខ្នាតយក្សមិនធ្លាប់មានពីមុនមកនេះ មានប្រវែងសរុប១០ម៉ែត្រកន្លះ មានតួស្នូកទទឹងប្រវែង ២,២០ម៉ែត្រ បណ្តោយប្រវែង ២,៨០ម៉ែត្រ និងកម្រាស់ ៦០សង់ទីម៉ែត្រ ហើយចាប៉ីនេះទៀតសោត នឹងត្រូវយកទៅដាក់តាំងបង្ហាញ ជូនប្រជាពលរដ្ឋខ្មែរ និងភ្ញៀវទេសចរអន្តរជាតិទស្សនា នៅក្នុងបរិវេណកម្មវិធី ភូមិខ្ញុំ នៃព្រឹត្តិការណ៍អង្គរសង្រ្កាន្ត ឆ្នាំ២០១៧ ដែលស្ថិតនៅទីតាំងខាងជើងប្រាសាទបាយ័ន។
សូមបញ្ជាក់ផងដែរថា ឆ្នាំមុនៗ មានអន្សមយក្ស មួកយក្ស បំពង់ទឹកត្នោតយក្ស អង្រុតយក្ស កន្ត្រងប្រហុកយក្ស និងមានកម្មវិធីរាំម៉ាឌីហ្សូន ដែលមានយុវជនចូលរួមជាងពីរពាន់នាក់ ដើម្បីបំបែកឯកត្តកម្មពិភពលោក ក្នុងព្រឹត្តិការណ៍អង្គរសង្ក្រាន្ត នាទឹកដីអង្គរដ៏ពិសិដ្ឋនៃខេត្តសៀមរាប ប៉ុន្តែឆ្នាំនេះក៏មានរបស់ចំនួន ៣ ទំហំខ្នាតយក្ស ដែលឧបករណ៍ភ្លេងបុរាណខ្មែរ គឺ ចាប៉ីយក្ស ដែលនឹងមានប្រវែង១០ម៉ែត្រ ទីពីរ មាន់យក្ស ដែលជារូបតំណាងនៃឆ្នាំរកា និងទីបី សម្បុកមាន់ខ្នាតយក្ស៕
